आज प्रचण्ड पुर्नवास आउँदै, भ्रष्टाचार विरुद्धको खबरदारी सभा सम्बोधन गर्ने 

कञ्चनपुर । आज नेकपा माओवादी केन्द्रका अध्यक्ष एव पूर्व प्रधानमन्त्री पुष्पकमल दाहाल (प्रचण्ड) कञ्चनपुर आउँदैछन् । शनिबार पुनर्वास नगरपालिका ६ प्रतिभानगरमा हुने खबरदारी सभा सम्बोधनका लागि पूर्व प्रधानमन्त्री प्रचण्ड पुनर्वास आउन लागेका हुन् । 

नेकपा माओवादी केन्द्रका केन्द्रीय सदस्य तथा सुप प्रदेश सभा सांसद ओम विक्रम भाट (सरल) ले पाटीले आयोजना गर्न लागेको भ्रष्टाचार र बेथिति विरुद्धको सभा सम्बोधनका लागि प्रचण्ड पुर्नवास आउन लागेको बताए । दिउँसो हुने सभालाई प्रचण्डले सम्बोधन गर्ने कार्यक्रम रहेको उनले बताए । 

वर्तमान काँग्रेस, एमाले सम्मिलित सरकारले सुशासन भन्दा आफ्ना भ्रष्टाचारीलाई जोगाउने विपक्षी दलका नेता कार्यकर्तामाथि झुटा मुद्दा लगाउने प्रवृत्ति हावी भएको भन्दै माओवादीले सीमावर्ती कञ्चनपुरको पुर्नवासमा खबरदारी सभा गर्न लागेको छ । 

सभाको सम्पूर्ण तयारी पुरा भएको माओवादी केन्द्र कञ्चनपुरका संयोजक खेम पाण्डेयले बताए । उनका अनुसार मञ्च व्यवस्थादेखिका आवश्यक सबै तयारी पुरा भएको छ । उनका अनुसार सभा सम्बोधन पूर्व नै पाट अध्यक्ष प्रचण्डले भारतीय पक्षबाट अतिक्रमणको कुचेष्टा गरिरहेको नेपाली प्यारातालको स्थलगत अनुगमन गर्ने कार्यक्रम तय गरिएको छ । यसका साथै कैलालीमा तस्कर समुहबाट मारिएका प्रहरीका असई गोविन्दको घर परिवारसँग भेटघाटदेखि सहिद गोविन्द गौतमको सालिकमा माल्यार्पण गर्ने कार्यक्रम रहेको छ । 

माओवादी केन्द्रका केन्द्रीय सदस्य लोकेन्द्र लम्सालले पाटी अध्यक्ष पुर्नवास आउने भएपछि यहाँका सीमा समस्यादेखिका विविध विषयमा समस्या समाधानका लागि पाटीले समेत ध्यानाकर्षण गराउने बताए । नेता लम्सालले सीमावर्ती प्याराताल सहितका स्थानको स्थलगत अनुगमन, सहिद गोविन्द गौतमको सालिकमा माल्यार्पण गराउने बताए ।  

माओवादी केन्द्रका सुदूरपश्चिम प्रदेश इन्चार्ज गिरीराजमणि पोखरेलले खबरदारी सभाको तयारी पुरै भएको बताए । प्रदेश इन्चार्ज पोखरेलले सरकारका गलत कामकारवाहीलाई जनतासमक्ष पुर्याउन खबरदारी सभा गर्न लागिएको बताए ।

पोखरेलले भ्रष्टाचार र बेथितिविरुद्ध माओवादीले खबरदारी सभाहरू गरिरहेको बताउँदै काठमाडौँबाट सुरु भएको खबरदारीलाई तलसम्मै लैजान लागिएको उनको भनाइ थियो । ‘हाम्रो पार्टीका अध्यक्ष प्रचण्डले सुशासन, समृद्धि र सामाजिक न्याय सहित १८ महिनाको नेतृत्व गर्नुभयो’ पोखरेलले भने, ‘अर्को सरकार आएपछि मुलुकलाई जुन दिशामा लैजान खोजिएको छ त्यसबारे जनतालाई जानकारी गराउँछौँ ।’ प्रचण्ड नेतृत्वले खोलेका भ्रष्टाचार फाइलहरू अहिलेको सरकारले थन्क्याएर राखेको उनले बताए । ‘अघिल्लो सरकारमा भ्रष्टाचारविरुद्ध एकपछि अर्को फाइल खोलिएका थिए’ पोखरेले भने, ‘अहिले कुन कुनामा ती अड्किएका छन् । यहाँहरुलाई थाहै छ ।’

  पोखरेलले संविधान संशोधनको सबैभन्दा बढी पक्षमा माओवादी रहेको दावी गर्दै संविधानका उपलब्धी कमजोर पार्ने गरी हुने संशोधन भने स्विकार्य नहुने बताए । ‘संविधान बनाउँदा नै आफ्ना असहमति राखेर हामी अगाडि बढेका हौँ । कोही संविधान संशोधनको पक्षमा छ भने सबैभन्दा बढी हाम्रो पार्टी छ’ उनले भने, ‘हामी शासकीय स्वरुपको यो मोडेल बदल्न चाहन्छौँ । हामी निर्वाचन प्रणाली बदल्न चाहन्छौँ ।’

 संविधान संशोधनबारे प्रतिपक्षले हालसम्म कुनै संवाद नगरेकोमा उनले असन्तुष्टि जनाए । ऐननिर्माण आदि दश वर्षभित्र गरिसक्नुपर्ने काम पुरा गरेरमात्र संविधान संशोधनको कुरा गर्नु जायज हुने उनको तर्क थियो । विद्युत प्राधिकरणका कार्यकारी निर्देशक कुलमान घिसिङसँग सरकारले निहुँ खोजिरहेको विषयलाई माओवादीले सुक्ष्मरुपमा हेरिरहेको उनले बताए । कार्यक्रममा हजारौँ नागरिक आउने जनाईएको छ । सभालाई भब्य र सभ्य बनाउन नेकपा माओवादी कञ्चनपुर संयोजक खेमराज पाण्डेयको संयोजकत्वमा ७० सदस्यीय उप समिति गठन गरिएको छ । 

माओवादी कचनपुरका इन्चार्ज टेकेन्द्र प्रसाद भट्ट (बिक्रम) संयोजकत्वमा ११ सदस्यीय मुलपरिचालन उपसमिति गठन गरिएको छ भने भट्टकै संयोजकत्वमा ८ सदस्यीय जनपरिचालन उपसमिति गठन गरिएको छ । माओवादी नेता बिरबल बिस्वकर्माको संयोजकत्वमा पाँच सदस्यीय आर्थिक व्यवस्थापन उपसमिति गठन गरिएको छ । नेतन देवकरको संयोजकत्वमा ७ सदस्यीय मञ्च व्यवस्थापन उपसमिति गठन गरिएको छ । माओवादी नेतृ माया नेगिको संयोजकत्वमा १२ सदस्यीय यातायात व्यवस्थापन उपसमिति गठन गरिएको छ । 

माओवादी केन्द्रीप सदस्य ओम बिक्रम भाट (सरल) संयोजकत्वमा ३ सदस्यीय प्रचारप्रसार उप समिति गठन गरिएको छ । अर्का केन्द्रीय सदस्य गोविन्द बिकको संयोजकत्वमा ७ सदस्यीय सुरक्षा तथा स्वयंसेवक परिचालन उपसमिति गठन गरिएको छ । कञ्चनपुरकी माओवादी नेतृ दिपा चौधरीको संयोजकत्वमा ७ सदस्यीय सांस्कृतिक परिचालन उपसमिति गठन गरिएको छ । केन्द्रीय सदस्य लोकेन्द्र लम्सालको संयोजकत्वमा १० सदस्यीय अतिथि स्वागत तथा सत्कार उपसमिति गठन गरिएको छ । केन्द्रीय सदस्य तथा संविधान सभा सदस्य देवीलाल चौधरीको संयोजकत्वमा ९ सदस्यीय एकता धुव्रीकरण्उा समायोजन उपसमिति गठन गरिएको छ । पाटी अध्यक्ष प्रंचण्ड जिल्लाको सीमावर्ती पुनर्वास नगरपालिका आउने भएपछि माओवादी केन्द्रका नेता कार्यकर्ता पुनर्वास क्षेत्रमा सकृयतापुर्वक खटिएका छन । खबरदारी सभा सफल पार्नका लागि स्थानीयदेखि केन्द्रीय स्तरका नेता कार्यकर्ताहरु अहिले सकृयतापुर्वक खटिएको माओवादी कञ्चनपुरले जनाएको छ । भने, नेता कार्यकर्ताहरु पनि बिहानैदेखि कार्यक्रम स्थलकालागि गईरहेका छन।