नेपाली कांग्रेसका केन्द्रीय सदस्य गोपालमान श्रेष्ठले नेकपा एमालेको अवरोध कायमैरहे मुलुक अर्ली इलेक्सनमा पनि जान सक्ने संभावना औल्याएका छन्। नेपाली कांग्रेस स्याङ्जाद्वारा आइतबार सदरमुकाममा आयोजित अगुवा प्रशिक्षण कार्यक्रमममा बोल्दै श्रेष्ठले सर्वोच्चमा रहेका मुद्धालाई लिएर एमालेले संसदमा नारा लगाउने, वेल घेराउ गर्ने जस्ता कार्यले संसद चल्ने वातावरण नमिलेको बताएका छन्।
पूर्वउपप्रधानमन्त्री समेत रहेका श्रेष्ठले भने, ‘संसदमा नारा लगाउदै वेल घेरेर एमालेले बन्दी बनायो। यसरी नै संसद अवरुद्ध बनाउदै जाने हो भने स्थानीय तहको निर्वाचन पहिले संसदीय निर्वाचनको संभावना रहन्छ।’तर, सो भने न्यून रहेको उनले बताए।
सरकारले स्थानीयतहको चुनाव बैशाख ३० गते गर्ने निर्णय गरेको छ। एमालेले बुद्धिमत्ता पूर्वक संसद चल्ने वातावरण बनाउनुपर्छ, नेता श्रेष्ठले भने, ‘सभामुख हटाउने पद्धती छुट्टै छ भने १४ जना संसदको निर्णय अदालतबाट हुनेछ।’
नेपाली कांग्रेसको महाधिवेशनका तिक्तता बिर्सेर जिल्लाका अगुवा कार्यकर्तालाई आसन्न स्थानीयतहको निर्वाचनमा जुट्न नेता श्रेष्ठले सुझाव दिए। चुनावमा टिकट बितरणको अधिकार जिल्ला र क्षेत्रलाई नै दिएको बताउदै उनले केन्द्रको हस्तक्षेप नरहने बताए।
सभापति राजु थापाले कांग्रेसका विधि विधान पालना गर्दै जिल्लाका नेता तथा कार्यकर्ताबीच समन्वय गर्दे अघि बढ्ने बताए। कार्यक्रममा गण्डकी प्रदेश उपसभापतिद्वय मेखलाल श्रेष्ठ र कल्पना तिवारी, जिल्ला उपसभापति केदार काफ्ले र सचिव गुरुप्रसाद भट्टराईले निर्वाचनमा नेपाली कांग्रेसको बहुमत आउनेगरी आजदेखि नै क्रियाशील रहने प्रतिवद्धता जनाए।
अन्तरक्रिया एवं भेटघाट कार्यक्रममा जिल्लादेखि वडातहसम्मका नेता तथा कार्यकर्ताको उल्लेख्य सहभागि थिए। नेता श्रेष्ठ ४ दिनअघि गृह जिल्ला स्याङ्जा आएका हुन। भवानी अधिकारीले अन्नपुर्ण पोस्टमा लेखेकी छन्।
Discussion about this post