नेपाली कांग्रेसका नेता प्रकाशमान सिंहले आसन्न स्थानीय तहको निर्वाचनमा चुनावी तालमेलका लागि पार्टीले सातवटै तहका कार्यसमितिको सल्लाहअनुसार निर्णय लिने बताएका छन् ।
काभ्रेको धुलिखेलमा बिहीबार आयोजित पत्रकार सम्मेलनमा नेता सिंहले चुनावी तालमेलका बारेमा निर्णय गर्नका लागि सबै तहका कार्यसमितिसँग राय लिइने बताएका हुन् ।
‘कांग्रेसले केन्द्रीय कार्यसमिति, सातवटै प्रदेश कार्यसमिति, ७७ जिल्ला कार्यसमिति, १६५ संघीय निर्वाचन क्षेत्र कार्यसमिति, ३३० प्रदेश निर्वाचन क्षेत्र कार्यसमिति, ७५३ पालिका कार्यसमिति, ६ हजार ७४३ वडा कार्यसमितिको भावनाअनुसार के गर्दा राम्रो हुन्छ ? पार्टीको हित हुनेगरी, संविधान जोगाउन, संघीयतालाई संस्थागत गर्न, विकास निर्माणका कार्य अगाडि बढाउन र सुशासनलाई सर्वोपरी हितमा राखेर कदम अगाडि बढाउँछ,’ उनले भने ।
उनले १४औँ महाधिवेशनबाट पार्टी नयाँ ऊर्जा उत्पन्न भएको जिकिर गर्दै कांग्रेस एक्लै पनि चुनाव लड्न तयार भएको बताए । ‘कांग्रेसको भर्खरै महाधिवेशन सम्पन्न भएको छ,’ सिंहले भने, ‘अर्गनाइजेसनमा उर्जा पैदा भएको छ । उर्जाअनुसार कांग्रेस एक्लै लड्नलाई पनि तयार छ ।’
प्रतिगमन रोक्न पाँच दलीय गठबन्धन बनेको र गठबन्धन सरकारले संविधानको भावना र मर्मअनुरुप सरकारले स्थानीय तहको निर्वाचन मिति तोकेको उनको भनाइ छ । अन्नपूर्ण पोस्ट बाट सभार
Discussion about this post