बैतडी – बैतडीको पाटन नगरपालिका–३ मा रहेको सिगास मावि गौरीशंकर पोखरीको विद्यालय व्यवस्थापन समितिको अध्यक्षमा प्रेमसिंह भाट पुनः चयन भएका छन्। शनिवार विद्यालयमा आयोजित अभिभावक भेलाले भाटको नेतृत्वमा नयाँ व्यवस्थापन समिति गठन गरेको हो।
भेलाबाट चयन भएको समितिको सदस्यहरूमा किरणसिंह महरा, निर्मला केसी, गोमती महरा र वसन्ती विष्ट रहेका छन्। यस्तै, दीपेन्द्र खत्री पदेन सदस्यको रूपमा चयन भएका छन् भने विद्यालयका प्रधानाध्यापक मानबहादुर चन्द समितिको सदस्य सचिव रहेका छन्। नवनिर्वाचित अध्यक्ष भाटले समितिको संरचना र उद्देश्यबारे जानकारी दिँदै यो कुरा बताए।
अध्यक्ष भाटले विद्यालयको चौतर्फी विकासका लागि आफ्नो नेतृत्वको समितिले सक्रियतापूर्वक काम गर्ने प्रतिबद्धता व्यक्त गरे। उनले भने, “हामी विद्यालयको शैक्षिक गुणस्तर सुधार, भौतिक संरचनाको विकास र आर्थिक व्यवस्थापनलाई बलियो बनाउन पहल गर्नेछौँ।” उनले अभिभावक र सरोकारवालाहरूको सहयोगमा विद्यालयलाई नमुना बनाउने लक्ष्य रहेको बताए।
भेलामा पाटन नगरपालिका–३ का वडा अध्यक्ष करुणाकर भट्ट, नगरपालिकाको शिक्षा शाखाका प्रतिनिधि बिर्खराज भट्टलगायत सरोकारवालाहरूको उपस्थिति रहेको थियो। उनीहरूले नयाँ समितिलाई शुभकामना दिँदै विद्यालयको विकासमा सहयोग गर्ने प्रतिबद्धता जनाए।
यसैगरी, भेलाले डम्मर दत्त पन्तको संयोजकत्वमा ११ सदस्यीय सल्लाहकार समिति पनि गठन गरेको छ। यो समितिले विद्यालय व्यवस्थापन समितिलाई आवश्यक सुझाव र सहयोग प्रदान गर्ने अपेक्षा गरिएको छ।
नवनिर्वाचित समितिले आगामी दिनमा विद्यालयको समग्र प्रगतिका लागि ठोस योजना बनाएर काम गर्ने विश्वास अभिभावक र स्थानीयले व्यक्त गरेका छन्।
Discussion about this post