महेन्द्रनगर : नेकपा एमाले कञ्चनपुरले गरेको चुनावी प्रतिबद्धता अनुरूप कञ्चनपुरको मझगाउँ विमानस्थल पुनर्निर्माण कार्य पूरा हुने भएको छ ।
भीमदत्त नगरपालिकाको मझगाउँमा रहेको विमानस्थल लामो समयदेखि सञ्चालन हुन सकेको थिएन । कतिपयले भारतीय सीमा नजिक हुनु र शुक्लाफाँटा निकुञ्ज नजिकै भएका कारण प्राविधिक रूपमै विमानस्थल सञ्चालन गर्न नसकिने तर्क गर्ने गरेका थिए ।
नेकपा एमालेका अध्यक्ष केपी शर्मा ओली नेतृत्वको सरकार बनेपछि प्राविधिक अध्ययन गरेर विमानस्थल पुनः सञ्चालन गर्न सकिने निधो भएको थियो । एमालेबाट मन्त्री बनेका तत्कालीन संस्कृति, पर्यटन तथा नागरिक उड्डयनमन्त्री योगेश भट्टराईको पालामा मझगाउँ विमानस्थल पुनः सञ्चालनमा प्राविधिक जटिलता नरहेको निर्णय भएको थियो ।
विमानस्थल पुनः सञ्चालन गर्न सकिने निष्कर्षसहित मन्त्रालयले पुनर्निर्माणका लागि लगानीको सुनिश्चितता खोजेको थियो । विमानस्थल पुनर्निर्माण गर्न संघ सरकारले ५०%, प्रदेश सरकारले २५%, भीमदत्त नगरपालिकाले १५% र दोधाराचाँदनी नगरपालिकाले १०% लगानी गर्ने सहमति जुटेको थियो ।
ओली सरकारकै पालामा भानुभक्त ढकाल पर्यटनमन्त्री हुँदा २०७६ फागुन ३ गते लगानी सम्झौता भएको थियो । लगानी सम्झौताअनुसार प्रदेश सरकारले २५% अर्थात् ८ करोड, भीमदत्त नगरपालिकाले १५% अर्थात् ३.५ करोड र दोधाराचाँदनी नगरपालिकाले १०% अर्थात् २ करोड लगानी गरिसकेका छन् ।
सबै पक्षले लगानी गरेपछि सरकारले ठेक्का प्रक्रियाबाट पुनर्निर्माण कार्य अगाडि बढाइसकेको छ । निर्माण कार्यलाई गुणस्तरीय र छिटो सम्पन्न गर्न भीमदत्त नगरपालिका मेयर सुरेन्द्र विष्टले सोमबार निरीक्षण गरेका छन् । निर्माणको ठेक्का कान्छाराम केएस जेभी निर्माण सेवा पाएको छ ।
विमानस्थल सञ्चालनका लागि १ हजार ५०० मिटरको रनवे, टर्मिनल भवन र ट्याक्सी स्ट्यान्ड लगायत आवश्यक संरचनाको निर्माण थालिएको कान्छाराम निर्माण सेवाका ईन्जिनियर प्रकाश श्रेष्ठले बताए ।
संरचना निर्माण सकिएलगत्तै महेन्द्रनगर–काठमाडौं हवाइ हुने सुरू हुनेछ । सरकारले २७ करोड लागत अनुमानको ठेक्का आह्वान गरेको थियो ।
विमानस्थल पुनः सञ्चालनका लागि तत्कालीन प्रधानमन्त्री केपी शर्मा ओलीको सरकार हुँदादेखि नै सांसदद्वय डा. दीपकप्रकाश भट्ट र निरुदेवी पाल तथा भीमदत्त नगरपालिकाका मेयर सुरेन्द्र विष्टले पहल गरिरहेका थिए । ओली सरकारकै पालामा अगाडि बढेको प्रक्रिया निर्माणको चरणमा पुगिसकेको छ ।
(Source : abhiyandainik.com)
Discussion about this post