मेयर कप : दशरथचन्द र खलंगा फाइनलमा

बैतडीको दशरथचन्द नगरपालिकामा जारी पाँचौँ संस्करणको मेयरकप क्रिकेट प्रतियोगिताको उपाधिका लागि दशरथचन्द नगरपालिका–५ दशरथचन्द र दशरथचन्द नगरपालिका–४ खलंगा भिड्ने भएका छन्।

आज भएको दोस्रो सेमिफाइनल खेलमा दशरथचन्द नगरपालिका–६ थालिगडालाई ४ विकेटले स्तब्ध पार्दै दशरथचन्दले खलंगासँग भेट पक्का गरेको हो। खलंगा गत संस्करणको च्याम्पियन टोली हो भने दशरथचन्द उपविजेता भएको थियो। थालिगडाले दिएको १ सय ३४ रनको लक्ष्य दशरथचन्दले १६ दशमलव ४ ओभरमा ६ विकेट गुमाएर पूरा ग¥यो। जसमा सुदीप टमटाले ३३ र जगदीश चन्दले नटआउट २६ रनको योगदान गरे। थालिगडाका सौरभ चन्दले २ विकेट लिए।

त्यसअघि पहिला ब्याटिङ गरेको थालिगडा १६ दशमलव १ ओभरमा १ सय ३३ रनमा समेटियो। कल्पेस चन्दको ३७ र मनोज ऐरीले ३६ रनको योगदान गरे पनि अन्य ब्याट्सम्यान नचल्दा थालिगडाको फाइनल खेल्ने सपना अधुरै रहेको हो। थालिगडाको पारी ध्वस्त पार्ने क्रममा दशरथचन्दका रोबिन चन्द एक्लैले ५ विकेट झारे। उनी खेलका म्यान अफ द म्याचसमेत चुनिएका स्कोरर खेमराज भट्टले जानकारी दिए। यसअघि आजै भएको पहिलो सेमिफाइनलमा दशरथचन्द नगरपालिका–१० बाराकोटलाई ५ विकेटले हराएको थियो।

उपाधि भिडन्त भोलि हुने दशरथचन्द नगरपालिकाका क्रिकेट प्रशिक्षक दीपेन्द्रबहादुर बोहराले बताए। उपाधि विजेता टोलीले ७५ हजार र उपविजेता टोलीले ५० हजार नगदका साथै ट्रफी, मेडल र प्रमाणपत्र पाउने नगर क्रिकेट समितिका संयोजक रमेश भट्टले बताए। दशरथचन्द नगरपालिकाको सहयोग र नगर क्रिकेट समितिको आयोजनामा फागुन २५ देखि सञ्चालन भएको प्रतियोगितामा ११ टोली सहभागी थिए। थाहा खबर बाट सभार