खानेपानीमन्त्री उमाकान्त चौधरीले तोकिएको समयभित्रै मेलम्चीको पानी काठमाडौं उपत्यकामा भित्र्याउन सरकार प्रतिवद्ध रहेको बताएका छन्।
नेपाल खानेपानी संस्थानको ३३ औं वार्षिकोत्सवको अवसरमा आइतवार काठमाडौंमा आयोजित कार्यक्रममा उनले काठमाडौंवासीलाई तोकिएको अवधिभित्रै मेलम्चीको पानी उपलब्ध गराउने गरी आयोजनाको काममा तीब्रता दिइएको दावी गरे।
मन्त्री चौधरीले प्रधानमन्त्री शेरबहादुर देउवाले पनि बाढी र पहिरोको कारण क्षति पुगेको मेलम्ची खानेपानी आवश्यक व्यवस्था मिलाएर काठमाडौंवासीलाई उपलब्ध गराउन राष्ट्रको नाममै सम्बोधन गरेको स्मरण गराउँदै व्यवस्थापनमा ढिलाइ नहुने प्रतिवद्धता जाहेर गरे।
मन्त्री चौधरीले खानेपानी महसुल निर्धारण आयोग केही दिनभित्रै गठन गर्ने घोषणा समेत गरे। केही वर्षदेखि उक्त आयोग रिक्त रहेको उल्लेख गर्दै उनले त्यसलाई पूर्णता दिन सरकारले प्रक्रिया अघि बढाइसकेको बताए।
मन्त्री चौधरीले ‘एक घर, एक घारा’ कार्यक्रमको सेवा विस्तार गर्न पनि सम्बन्धित निकायलाई सचेत गराए। हाल सो सेवा देशका विभिन्न २३ वटा सहरहरुमा सञ्चालनमा आएको छ। त्यसलाई देशभर विस्तार गर्न मन्त्री चौधरीले नेपाल खानेपानी संस्थान, खानेपानी विभागलाई निर्देशन दिए। थाहा खबर बाट सभार
Discussion about this post