ढल्केवर । अतिक्रमित सरकारी जग्गा खाली गराउने अभियान सञ्चालन गर्न सुरक्षा सहयोग नपाएको भन्दै महोत्तरीको गौशाला नगरपालिकाले प्रधानमन्त्री बालेन्द्र शाहसँग सुरक्षा व्यवस्था मिलाइदिन आग्रह गरेको छ।
नगरप्रमुख डा. दीपेन्द्र महतोले शुक्रबार प्रधानमन्त्रीलाई पत्र लेख्दै सरकारी जग्गा अतिक्रमणमुक्त गराउने अभियानका लागि आवश्यक सुरक्षा प्रबन्ध गर्न माग गरेका हुन्।
नगरप्रमुख महतोका अनुसार साविक शिवभक्तिखोर गाविस–१ स्थित कित्ता नम्बर ११५ को पाँच बिघा तीन कठ्ठा आठ धुर जग्गा नेपाल सरकारको नाममा दर्ता छ। उक्त जग्गामा ४२ वटा घर निर्माण गरी स्थानीयहरू बसोबास गर्दै आएका छन्। तीमध्ये दुई घरपरिवारलाई वैकल्पिक आवास उपलब्ध गराउने प्रस्ताव नगरपालिकाले गरेको उनले बताए।
नगरपालिकाले पटक–पटक सूचना जारी गरी जग्गा खाली गर्न आग्रह गरे पनि अटेर भएपछि समस्या समाधान हुन नसकेको जनाएको छ। उक्त जग्गा खाली गराएर बाल उद्यान निर्माण गर्नुका साथै हाटबजार व्यवस्थित गर्ने नगरपालिकाको योजना छ।
जग्गामा बसोबास गर्दै आएका स्थानीयले आफ्नो नाममा जग्गा कायम गराउन सर्वोच्च अदालत र उच्च अदालत जनकपुरमा रिट दायर गरेका थिए। तर, दुवै अदालतले रिट खारेज गरिसकेको नगरपालिकाको दाबी छ।
यसअघि गत चैतमा सुरक्षा निकायको सहयोगमा निर्माणाधीन पक्की संरचना भत्काइए पनि जग्गा पूर्ण रूपमा खाली गराउने प्रक्रिया अघि बढ्न सकेको थिएन। नगरपालिकाको तयारीविरुद्ध स्थानीयले संघर्ष समिति गठन गरी वैकल्पिक व्यवस्था नगरी घरटहरा हटाउन नहुने मागसमेत राख्दै आएका छन्।
नगरप्रमुख महतोले विभिन्न सरकारी निकायसँग पटक–पटक सुरक्षा सहयोग माग्दा पनि सुनुवाइ नभएपछि प्रधानमन्त्रीलाई नै पत्र लेख्नुपरेको बताए। सुरक्षा व्यवस्था उपलब्ध भए २४ घण्टाभित्र अतिक्रमित जग्गा खाली गराउने उनको दाबी छ।
Discussion about this post