कञ्चनपुर । कञ्चनपुरको भीमदत्त नगरपालिका–११ मा सञ्चालित २० दिने कृत्रिम बुद्धिमत्ता (एआई) तालिम सम्पन्न भएको छ । बदलिँदो प्रविधिसँगै युवालाई आधुनिक प्रविधिको ज्ञान र सीप प्रदान गरी प्रविधिमैत्री बनाउने उद्देश्यले सञ्चालन गरिएको तालिममा वडाका २८ जनाको सहभागिता रहेको थियो ।
भीमदत्त नगरपालिका वडा नम्बर ११ को आयोजना तथा काठमाडौं स्कुल अफ इन्टरनेट मार्केटिङ प्रालिको सहजीकरणमा सञ्चालन भएको तालिममा सहभागीलाई कृत्रिम बुद्धिमत्ताको प्रयोग, यसको व्यावहारिक उपयोगिता तथा विभिन्न कामलाई सहज, प्रभावकारी र सिर्जनात्मक बनाउने तरिकाबारे प्रशिक्षण दिइएको थियो ।
तालिम समापन कार्यक्रममा वडा अध्यक्ष प्रकाश थापाले एआईसम्बन्धी तालिम समयसापेक्ष र उपयोगी रहेको बताउनुभयो । बदलिँदो प्रविधिसँगै नयाँ सीप सिक्नु आवश्यक रहेको उल्लेख गर्दै उहाँले तालिमबाट प्राप्त ज्ञान र सीपलाई व्यवहारमा प्रयोग गर्न सहभागीलाई आग्रह गर्नुभयो ।
उहाँले तालिमले युवालाई प्रविधिमैत्री बनाउन तथा भविष्यमा रोजगारी र स्वरोजगारका नयाँ सम्भावना खोज्न सहयोग पुग्ने विश्वास व्यक्त गर्नुभयो ।
कृत्रिम बुद्धिमत्ता प्रविधिको प्रयोग शिक्षा, सञ्चार, व्यवसाय, अध्ययन, अनुसन्धान तथा दैनिक कार्यसम्पादनका क्षेत्रमा विस्तार हुँदै गएको छ । यसको व्यावहारिक ज्ञानले समय र श्रम बचत गर्नुका साथै डिजिटल क्षेत्रमा नयाँ अवसर खोज्न युवालाई सहयोग पुग्ने अपेक्षा गरिएको छ ।
२० दिनसम्म सञ्चालन भएको तालिमबाट प्राप्त ज्ञान र सीपलाई व्यक्तिगत तथा व्यावसायिक जीवनमा उपयोग गर्न सकिने अपेक्षा गरिएको छ । वडा नम्बर ११ ले स्थानीय युवालाई आधुनिक प्रविधिसँग जोड्ने उद्देश्यले तालिम सञ्चालन गरेको जनाएको छ ।
Discussion about this post