काठमाडौं — बङ्गलादेशका युवा क्रिकेटर परवेज हुसेन इमोन नेपाल प्रिमियर लिग (एनपीएल) को तेस्रो संस्करणमा जनकपुर बोल्ट्सबाट खेल्ने भएका छन्।
जनकपुर बोल्ट्सले सामाजिक सञ्जालमार्फत इमोनलाई टोलीमा स्वागत गर्दै अनुबन्ध गरिएको जानकारी दिएको हो।
२४ वर्षीय बायाँहाते ब्याटर इमोन सन् २०२० मा बङ्गलादेशले यू–१९ विश्वकपको उपाधि जित्दा टोलीका सदस्य थिए। उनले सन् २०२०–२१ को बङ्गबन्धु टी–२० कपमा मात्र ४२ बलमा शतक प्रहार गरेका थिए।
त्यस्तै, उनले सन् २०२५ मा संयुक्त अरब इमिरेट्स (यूएई) विरुद्धको टी–२० अन्तर्राष्ट्रिय खेलमा पनि शतक बनाएका थिए। इमोनले हालसम्म ४० टी–२० अन्तर्राष्ट्रिय र चार एकदिवसीय अन्तर्राष्ट्रिय खेल खेलेका छन्।
पाकिस्तान सुपर लिग (पीएसएल) मा समेत खेलिसकेका इमोनका लागि एनपीएल दोस्रो विदेशी लिग हुनेछ। उनको आगमनले जनकपुर बोल्ट्सको ब्याटिङ पक्ष थप बलियो हुने अपेक्षा गरिएको छ।
Discussion about this post