काठमाडौं । नेपाली मौलिक संस्कृति, गाउँघरको आत्मीयता र तिहारको उल्लास समेटिएको तिहार विशेष गीत ‘गाउँघरै घमाइलो’ को म्युजिक भिडियो सार्वजनिक भएको छ। सन् २०२६ को तिहारलाई लक्षित गरी तयार पारिएको गीतले नेपाली परम्परा, पारिवारिक सम्बन्ध र सांस्कृतिक पहिचानको महत्त्वलाई उजागर गरेको छ।
पूर्वन्यायाधीश तथा गीतकार भीमकुमार ओझाको शब्द र आफ्नै लगानीमा तयार भएको गीत उहाँकै आधिकारिक युट्युब च्यानल Bhim Kumar Ojha Official मार्फत सार्वजनिक गरिएको हो।
गीतमा चर्चित संगीतकार सन्तोष बिसीको संगीत रहेको छ भने सन्तोष बिसी, अञ्जु गौतम, जुन प्रसाई र पार्वती भुजेलले स्वर दिएका छन्। नारायण दङ्गालको संगीत संयोजन रहेको गीत बागबजारस्थित शङ्करा रेकर्डिङ स्टुडियोमा रेकर्ड गरिएको हो। रेकर्डिङमा सागर पुन तथा मिक्सिङ र मास्टरिङमा इन्जिनियर कुमार सानुको योगदान रहेको छ।
यम गुरुङको कोरियोग्राफी रहेको म्युजिक भिडियोमा गीतकार ओझासहित उहाँकी धर्मपत्नी देवी ओझा, आयुष्मा खत्री, सरिता ओझा, सुधीर श्रेष्ठ, रिना थापा मगर, अनिस क्षेत्री र ज्योति खड्काले अभिनय गरेका छन्।
गीतकार ओझाका अनुसार ‘गाउँघरै घमाइलो’ मनोरञ्जनमा मात्र सीमित नभई नेपाली मौलिक संस्कार, संस्कृति र गाउँघरप्रतिको आत्मीयता अभिव्यक्त गर्ने प्रयास हो। आधुनिकताको प्रभावसँगै ओझेल पर्दै गएका सांस्कृतिक परम्परालाई नयाँ पुस्तासम्म पुर्याउनु गीतको मुख्य उद्देश्य रहेको उहाँले बताउनुभयो।
तिहारको झिलिमिली, दीपावली, देउसी–भैलो, दाजुभाइ तथा दिदीबहिनीबीचको सम्बन्ध र पारिवारिक मायालाई गीत तथा दृश्यका माध्यमबाट प्रस्तुत गरिएको छ। यसले विदेशमा रहेका नेपालीलाई गाउँघर र परिवारको सम्झना गराउनुका साथै स्वदेशमा रहेकाहरूमा मौलिक संस्कृति संरक्षणप्रतिको चेतना बढाउने अपेक्षा गरिएको छ।
आफ्नो सिर्जना दर्शक तथा श्रोतामाझ पुर्याउन पाउँदा खुसी लागेको बताउँदै गीतकार ओझाले गीतमार्फत नेपालीपन र सांस्कृतिक परम्पराप्रतिको प्रेम अभिव्यक्त गर्न खोजिएको उल्लेख गर्नुभयो।
तिहारको उल्लाससँगै आत्मीयता, सद्भाव र सांस्कृतिक संरक्षणको सन्देश बोकेको ‘गाउँघरै घमाइलो’ ले नेपाली मौलिक परम्परालाई नयाँ पुस्तासम्म पुर्याउन योगदान गर्ने अपेक्षा गरिएको छ।
Discussion about this post