काठमाडौं । सरकारले सात दशक पुरानो प्रहरी ऐनलाई प्रतिस्थापन गर्दै समयसापेक्ष, व्यावसायिक र प्रविधिमैत्री प्रहरी सङ्गठन निर्माणका लागि नयाँ प्रहरी विधेयक अघि बढाएको जनाएको छ।
७१औँ प्रहरी दिवसका अवसरमा आयोजित कार्यक्रममा गृहमन्त्री सुधन गुरुङले प्रहरी कर्मचारीको सरुवा–बढुवालाई प्रणालीगत बनाउँदै हाकिमलाई रिझाएर अवसर प्राप्त गर्ने प्रवृत्तिको अन्त्य गरिने बताउनुभयो। उहाँले प्रहरीको सेवा अवधिसम्बन्धी व्यवस्थालाई समेत समयानुकूल परिमार्जन गर्ने घोषणा गर्नुभयो।
गृहमन्त्री गुरुङका अनुसार अपराध अनुसन्धानलाई वैज्ञानिक र प्रभावकारी बनाउन कृत्रिम बुद्धिमत्ता (एआई), डिजिटल फोरेन्सिक, साइबर अनुसन्धान तथा डीएनए प्रोफाइलिङजस्ता आधुनिक प्रविधिमा लगानी बढाइनेछ। बदलिँदो सुरक्षा चुनौती सामना गर्न अन्तर्राष्ट्रिय सूचना आदानप्रदान र प्रविधिगत सहकार्यलाई समेत प्राथमिकता दिइने उहाँले बताउनुभयो।
उहाँले प्रहरी कर्मचारीको आवास, स्वास्थ्य सेवा तथा जोखिम भत्ताको दायरा विस्तार गरिँदै लगिएको उल्लेख गर्दै प्राकृतिक विपद्का समयमा अग्रपङ्क्तिमा खटिने सुरक्षाकर्मीलाई आवश्यक सुविधा उपलब्ध गराइएको जानकारी दिनुभयो। अवकाश प्राप्त प्रहरी कर्मचारीको ज्ञान, सीप र अनुभवलाई राष्ट्रहितमा उपयोग गर्ने नीति ल्याउने तयारीसमेत रहेको उहाँको भनाइ छ।
कार्यक्रममा प्रहरी महानिरीक्षक दानबहादुर कार्कीले नेपाल प्रहरीलाई समयानुकूल, प्रविधिमैत्री र प्रभावकारी बनाउन आधुनिक संरचना तथा रणनीतिक योजनामार्फत काम अघि बढाइएको बताउनुभयो।
सूचना प्रविधिको प्रयोगले अपराध अनुसन्धानमा सुधार आएको उल्लेख गर्दै उहाँले प्रहरी सङ्गठनलाई थप उत्तरदायी बनाउन सबै पक्षको सहयोग र समन्वय आवश्यक रहेको बताउनुभयो। साथै, उहाँले कर्तव्यपालनका क्रममा ज्यान गुमाएका अमर प्रहरीहरूको योगदान र बलिदानको स्मरण गर्नुभयो।
Discussion about this post