काठमाडौं । नेपाली कांग्रेसको १५औँ महाधिवेशनअन्तर्गत नयाँ केन्द्रीय कार्यसमिति चयनका लागि मतदान सुरु भएको छ। निर्वाचन समितिका अनुसार दिउँसो ३ बजेसम्म मतदान सम्पन्न गर्ने लक्ष्य राखिएको छ भने आजै मतगणना सुरु गर्ने तयारी छ।
ज्येष्ठ महाधिवेशन प्रतिनिधि शोभाकान्त बरालले गण्डकी प्रदेशबाट पहिलो मत खसालेका छन्। खराब मौसम र प्राविधिक कारणले हिजोका लागि तय गरिएको मतदान आज बिहानका लागि सारिएको थियो।
निर्वाचन समितिका सदस्य–सचिव राजु कटुवालका अनुसार कुल ७ हजार ३ सय १७ महाधिवेशन प्रतिनिधिले मतदान गर्नेछन्। मतपत्र छपाइमा ढिलाइ हुनुका साथै रातिको समयमा मतदान गर्दा प्रतिनिधिलाई कठिनाइ हुने भएकाले मतदान कार्यतालिका परिवर्तन गरिएको हो।
महाधिवेशन एक दिन लम्बिएपछि शुक्रबार प्रतिनिधिहरूको होटल बसाइ र खानाको खर्च पार्टीले नै बेहोर्ने आर्थिक व्यवस्थापन समितिले जनाएको छ।
मतदानका लागि प्रदेश तथा समूहअनुसार छुट्टाछुट्टै केन्द्र तोकिएका छन्। मतदानअघि प्रतिनिधिको परिचयपत्र र मतदाता नामावली रुजु गरिनेछ। मतदानस्थलमा मोबाइल फोनलगायत निषेधित सामग्री लैजान नपाइने निर्वाचन समितिले जनाएको छ।
मतदान सम्पन्न भएपछि मतपेटिका सुरक्षित रूपमा सङ्कलन गरी आजै मतगणना सुरु गर्ने तयारी छ। १५औँ महाधिवेशनले २९७ सदस्यीय केन्द्रीय कार्यसमिति चयन गर्ने भएकाले कांग्रेसको नयाँ नेतृत्वका लागि प्रतिस्पर्धा रोचक बनेको छ।
Discussion about this post