काठमाडौं । नेकपा (एमाले) का महासचिव शंकर पोखरेलले सरकार राजनीतिक दल, संसद् र नागरिकसँग संवाद नगरी अधिनायकवादतर्फ उन्मुख भएको आरोप लगाएका छन्।
नेपाली कांग्रेसको १५औँ महाधिवेशनलाई सम्बोधन गर्दै पोखरेलले सरकारको संवादहीन कार्यशैलीले आगामी दिनमा थप संकट निम्तिन सक्ने भन्दै चिन्ता व्यक्त गरे। उनले लोकतन्त्रको भविष्यप्रति समेत गम्भीर प्रश्न उठेको बताए।
पोखरेलले प्रधानमन्त्रीले आफूले नेतृत्व गरेको संसदीय दल र जनतासँग समेत पर्याप्त संवाद नगरेको आरोप लगाए। ‘हामी लोकतन्त्रतर्फ अघि बढिरहेका छौँ कि अधिनायकवादतर्फ?’ भन्दै उनले प्रश्न गरे।
उनले लोकतन्त्रको रक्षा र राष्ट्रिय संकट समाधानका लागि राजनीतिक दलहरूबीच सहकार्य आवश्यक रहेको बताए। विगतमा लोकतन्त्रवादी तथा वामपन्थी शक्तिहरूले राणा शासन र राजतन्त्रविरुद्ध एकताबद्ध भएर संघर्ष गरेझैँ अहिले पनि राष्ट्रिय सवालमा साझा धारणा बनाउनुपर्ने उनको भनाइ थियो।
पोखरेलले जनताले स्थायित्व, सुशासन र विकासका लागि एउटै दललाई झन्डै दुई तिहाइको जनादेश दिएको स्मरण गराउँदै त्यसअनुसार सरकार अघि बढ्न नसकेको दाबी गरे।
उनका अनुसार मुलुकको वर्तमान अवस्था, भूराजनीतिक परिस्थिति र राष्ट्रिय सुरक्षाका विषयमा सबै राजनीतिक दल गम्भीर हुनुपर्ने अवस्था छ।
‘राष्ट्रिय सवालमा हामी सबै दल एक ठाउँमा आउनुपर्छ। जनता र छिमेकीलाई समेत आश्वस्त पार्नुपर्ने आवश्यकता छ,’ पोखरेलले भने।
सरकारले सुशासन र विकासको जनादेश पाए पनि सेवा प्रवाह प्रभावकारी हुन नसकेको तथा रोजगारीका लागि विदेश जाने नेपालीको संख्या घटाउन नसकेको उनले आरोप लगाए।
Discussion about this post