फ्रान्समा विद्यार्थी आन्दोलन चर्किँदै देशका विभिन्न क्षेत्रमा फैलिएको छ। आन्दोलनका क्रममा विद्यार्थीले विद्यालय परिसरबाहिर आगजनी गर्नुका साथै प्रहरीसँग झडपसमेत भएको जनाइएको छ।अघिल्लो सातादेखि सुरु भएको आन्दोलनका कारण देशभरका ५६० भन्दा बढी उच्च माध्यमिक विद्यालयमा पठनपाठन प्रभावित भएको फ्रान्सको शिक्षा मन्त्रालयले जनाएको छ।
पेरिस क्षेत्रबाट सुरु भएको आन्दोलन केही दिनमै देशका अन्य क्षेत्रमा समेत फैलिएको हो। विद्यार्थीहरूले लामो कक्षासमय, पर्याप्त भौतिक पूर्वाधारको अभाव, अत्यधिक गर्मी हुने कक्षाकोठा तथा शिक्षक र पाठ्यपुस्तकको अभावलगायतका विषय उठाएका छन्।
समाचार संस्था एएफपीका अनुसार विद्यार्थीहरूले विद्यालयको शैक्षिक वातावरण सुधार गर्नुपर्ने माग गर्दै प्रदर्शन गरिरहेका छन्। सरकारले विद्यार्थीले उठाएका केही माग जायज रहेको स्वीकार गरेको छ। तर आन्दोलनका क्रममा आगजनी तथा प्रहरीसँग भएको झडपलगायतका घटनाप्रति सरकारले आलोचना गरेको छ।
Discussion about this post