नागोया, जापान । कुनै समय नेपाललाई एसियाली खेलकुदमा पदक दिलाउने प्रमुख खेलका रूपमा रहेको तेक्वान्दोले लगातार पाँचौं एसियाडमा पनि पदक जित्न सकेन। जापानको आइची–नागोयामा जारी २०औँ एसियाली खेलकुदमा सहभागी नेपाली तेक्वान्दो खेलाडी पदकविहीन बनेपछि नेपालको निराशाजनक शृंखला पाँच संस्करणसम्म पुगेको हो।
शुक्रबार पुरुष ग्योरोगीको ८० केजीमुनि तौलसमूहमा प्रतिस्पर्धा गरेका अभिषेक बराल अन्तिम १६ बाटै बाहिरिए। तोयाहासी जिम्नाजियममा भएको खेलमा उनी उज्वेकिस्तानका जसुरवेक जयसुनोभसँग २–० ले पराजित भए। पहिलो राउन्डमा १२–२ र दोस्रो राउन्डमा १९–२ ले पछि परेका अभिषेकको प्रतियोगिता त्यहीँ समाप्त भयो।
यसअघि बिहीबार पुम्सेमा सहभागी दुई नेपाली खेलाडी पनि अन्तिम १६ बाटै बाहिरिएका थिए। महिला एकल पुम्सेमा स्वस्तिका तामाङ ६.५७ अंकसहित आफ्नो समूहमा आठौं स्थानमा रहिन्। पुरुष एकल पुम्सेमा युवराज रानाले ७.०२ अंक प्राप्त गर्दै आठ खेलाडीमध्ये आठौं स्थान हासिल गरे।
अभिषेक वरीयताका आधारमा एसियाडका लागि छनोट भएका थिए भने युवराज वाइल्ड कार्ड र स्वस्तिका रिप्लेसमेन्ट कोटाबाट छनोट भएका थिए।
पाँच एसियाडदेखि पदकविहीन
नेपालले एसियाली खेलकुदमा तेक्वान्दोबाट सन् १९८६ को सियोल एसियाडदेखि पदक जित्न थालेको थियो। त्यसपछि १९९४ को हिरोसिमा, १९९८ को बैंकक, २००२ को बुसान र २००६ को दोहा एसियाडमा पनि नेपाली खेलाडीले पदक जितेका थिए।
सन् १९९८ मा सविता राजभण्डारीले रजत पदक जित्दै नेपालका लागि तेक्वान्दोमा ऐतिहासिक उपलब्धि हासिल गरेकी थिइन्। त्यसबाहेक विभिन्न संस्करणमा नेपाली खेलाडीले कांस्य पदक जित्दै आएका थिए।
तर २०१० को ग्वाङ्झाउदेखि नेपालको तेक्वान्दो एसियाडमा पदकविहीन हुँदै आएको छ। २०१४ को इन्चोन, २०१८ को जकार्ता–पालेम्बाङ र २०२२ को हाङझाउपछि यसपटक नागोयामा पनि पदक जित्न नसक्दा लगातार पाँचौं संस्करणमा तेक्वान्दो खाली हात फर्किएको हो।
तेक्वान्दोले एसियाली खेलकुदमा नेपाललाई हालसम्म एक रजत र १३ कांस्य गरी १४ पदक दिलाएको छ।
Discussion about this post