कञ्चनपुर । वेदकोट नगरपालिका -७ बसन्तपुरस्थित पशुपति आधारभूत विद्यालयमा नयाँ भवन निर्माणका लागि शिलान्यास गरिएको छ । वेदकोट नगरपालिकाका नगर प्रमुख भोजराज बोहराले एक कार्यक्रमबीच भवनको शिलान्यास गरेका हुन् ।
संघीय सरकारको बजेटअन्तर्गत स्वर्गीय माननीय बल्देव बोहराको विशेष पहलमा निर्माण हुन लागेको भवनका लागि करिब १ करोड ७५ लाख रुपैयाँमा सम्झौता भएको जनाइएको छ ।
नयाँ भवन निर्माण सम्पन्न भएपछि बसन्तपुर तथा आसपासका क्षेत्रका विद्यार्थीलाई पठनपाठनका लागि थप सहज र व्यवस्थित वातावरण बन्ने अपेक्षा गरिएको छ । विद्यालयको भौतिक पूर्वाधार विस्तारले शैक्षिक गतिविधिमा समेत सकारात्मक प्रभाव पार्ने विद्यालयको विश्वास छ ।
भवन शिलान्यास कार्यक्रममा नगर प्रमुख बोहराले गुणस्तरीय शिक्षाका लागि विद्यालयको भौतिक पूर्वाधार महत्वपूर्ण हुने बताउँदै विद्यालयको पूर्वाधार विकासमा नगरपालिकाबाट आवश्यक सहयोग तथा समन्वय गर्ने प्रतिबद्धता जनाएका छन् ।
कार्यक्रममा वडा नम्बर -७ का अध्यक्ष थानेश्वरप्रसाद भट्ट, विद्यालयका प्रधानाध्यापक शुशिला जोशी बोहरा, विद्यालय व्यवस्थापन समितिका अध्यक्ष बन्धु राम डगौरा, निर्माण कम्पनीका सञ्चालक बृजबहादुर चन्द, पीटीए अध्यक्ष टीकाराम भट्ट, नगरपालिका कर्मचारी प्रकाश कलौनी लगायत स्थानीयवासीको सहभागिता रहेको थियो ।
Discussion about this post