काठमाडौं – परराष्ट्रमन्त्री शिशिर खनालले नेपालमा हालै आएको बाढीबाट प्रभावित क्षेत्रको पुनःस्थापना, पुनर्वास तथा पुनर्निर्माणका लागि जर्मनीसँग सहयोग गर्न आग्रह गरेका छन्।
संयुक्त राष्ट्रसंघको ८१औँ महासभाका अवसरमा न्युयोर्कस्थित संयुक्त राष्ट्रसंघको मुख्यालयमा जर्मनीकी आर्थिक सहयोग तथा विकासमन्त्री रिम अलाबाली राडोभानसँग भएको द्विपक्षीय भेटवार्तामा खनालले विपद्पछिको पुनर्निर्माणसँगै जलवायु उत्थानशीलता, विपद् पूर्वतयारी र क्षमता अभिवृद्धिमा थप लगानी आवश्यक रहेको बताएका हुन्।
भेटमा खनालले बाढीबाट भएको जनधनको क्षतिप्रति जर्मन सरकार तथा जनताले व्यक्त गरेको सहानुभूति, ऐक्यबद्धता र सहयोगका लागि आभार व्यक्त गरे। उनले नेपालको विकास प्रक्रियामा जर्मनीले लामो समयदेखि पुर्याउँदै आएको सहयोगको प्रशंसा गर्दै जलवायु परिवर्तनका चुनौती सामना गर्न अन्तर्राष्ट्रिय सहकार्य आवश्यक रहेको बताए।
जर्मनीकी मन्त्री राडोभानले नेपालमा भएको विपद्लाई विश्वव्यापी साझा चुनौतीका रूपमा लिनुपर्ने बताउँदै जर्मनी नेपाललाई वित्तीय तथा मानवीय सहयोग उपलब्ध गराउन प्रतिबद्ध रहेको स्पष्ट पारिन्।
भेटवार्तामा नेपाल–जर्मनी सम्बन्धका विभिन्न पक्ष तथा पारस्परिक हितका क्षेत्रमा सहकार्यलाई थप सुदृढ बनाउने विषयमा समेत छलफल भएको जनाइएको छ।
Discussion about this post