काठमाडौं – ठूलो वर्षा र बाढीको सम्भावनालाई ध्यानमा राख्दै नेपाल कृषि अनुसन्धान परिषद् (नार्क) अन्तर्गतको राष्ट्रिय कृषि वातावरण अनुसन्धान केन्द्रले किसानलाई आवश्यक पूर्वतयारी अपनाउन आग्रह गरेको छ।
केन्द्रले कृषि मौसम सल्लाह बुलेटिन जारी गर्दै शुक्रबारदेखि हुनसक्ने ठूलो वर्षाका बेला सुरक्षालाई पहिलो प्राथमिकतामा राख्दै कृषिबाली तथा कृषि संरचना जोगाउन आवश्यक सावधानी अपनाउन सुझाव दिएको हो।
विशेषगरी नदी तथा खोलानजिक रहेका कृषि संरचना र धानबालीलाई क्षति हुन नदिन पूर्वतयारी गर्न केन्द्रले आग्रह गरेको छ। खेतबारीमा जाने बाटो, गल्ली, कुलो तथा अन्य माध्यमबाट भेल पस्न नदिन र धान पाक्न लागेको खेत, तरकारीबारी तथा फलफूल बगैँचामा पानी निकासको उचित व्यवस्था गर्न सुझाव दिइएको छ।
त्यस्तै, वर्षाको समयमा बालीमा रासायनिक मल, विषादी तथा अन्य पोषक तत्व प्रयोग नगर्न, कम्पोस्ट र गोठेमललाई पानीबाट जोगाएर राख्न पनि केन्द्रले भनेको छ।
हावाहुरीका कारण उखु ढल्न सक्ने भएकाले चार–पाँच वटा उखुलाई मुठा बनाएर डोरीले बाँध्नसमेत किसानलाई सुझाव दिइएको छ।
Discussion about this post