काठमाडौं । नेपाली कम्युनिस्ट पार्टी (नेकपा) का नेता वर्षमान पुनले दसैँ, तिहार र छठपछि वर्तमान सरकारविरुद्ध जनता सडकमा उत्रिने दाबी गरेका छन्।
शनिबार काठमाडौंमा नेकपा गण्डकी प्रदेश सम्पर्क समितिले आयोजना गरेको कार्यक्रममा बोल्दै पुनले सरकारको कार्यशैलीप्रति जनतामा असन्तुष्टि र आक्रोश बढ्दै गएको दाबी गरे।
उनले सरकार स्वेच्छाचारी, निरंकुश र गैरजिम्मेवार ढंगले अघि बढेको आरोप लगाउँदै चाडपर्वपछि स्वतःस्फूर्त रूपमा विरोध प्रदर्शन हुनसक्ने बताए। यस्तो अवस्था आए त्यसको नेतृत्व र व्यवस्थापनका लागि पार्टी पंक्ति अहिलेदेखि नै तयारी अवस्थामा रहनुपर्ने उनको भनाइ थियो।
पुनले रसुवा बाढीपछिको उद्धार तथा राहत, बजारमा ग्यासको उपलब्धता, किसानलाई मल र बढ्दो महँगीलगायत विषयमा सरकारमाथि प्रश्न उठाएका छन्।
उनले सरकारको कार्यशैलीका कारण राष्ट्रियता र राष्ट्रिय स्वाधीनता कमजोर हुँदै गएको दाबी गर्दै त्यसको रक्षाका लागि राजनीतिक तथा सामाजिक रूपमा सक्रिय हुनुपर्ने धारणा पनि राखे।
Discussion about this post