काठमाडौं । विद्यालय शिक्षा विधेयकको मस्यौदा तयारीलाई तीव्रता दिन शिक्षा तथा खेलकुद मन्त्रालयले सात सदस्यीय कार्यदल गठन गरेको छ। मन्त्रालयले शिक्षामन्त्रीका प्रमुख सल्लाहकार शैलेन्द्र झाको संयोजकत्वमा कार्यदल गठन गरेको हो।
कार्यदलमा मन्त्रालयका पदाधिकारीसँगै शिक्षा क्षेत्रका विज्ञलाई समेत समेटिएको मन्त्रालयले जनाएको छ। विद्यालय शिक्षा विधेयकको मस्यौदासम्बन्धी प्राविधिक तथा आवश्यक कामलाई शीघ्र अघि बढाउने उद्देश्यले कार्यदल गठन गरिएको मन्त्रालयको भनाइ छ।
कार्यदलले विद्यालय शिक्षाका विभिन्न पक्ष, वर्तमान आवश्यकता तथा दीर्घकालीन सुधारका विषयलाई समेटेर विधेयकको नयाँ मस्यौदा तयार गर्नेछ। यस क्रममा विद्यालय शिक्षा प्रणालीलाई थप प्रभावकारी बनाउने विषयमा आवश्यक अध्ययन तथा छलफल गरिनेछ।
यसअघि संसद्मा पेस भएको विद्यालय शिक्षा विधेयक प्रतिनिधि सभाअन्तर्गतको शिक्षा, स्वास्थ्य तथा सूचना प्रविधि समितिमा छलफल भएको थियो। तर, विधेयकसम्बन्धी प्रक्रिया अघि बढ्न सकेको थिएन।
मन्त्रालयले यसपटक यसअघिको विधेयकको मस्यौदालाई समेत आधार बनाउँदै विद्यालय शिक्षाका बहुआयामिक पक्ष, बदलिँदो आवश्यकता र दीर्घकालीन सुधारलाई समेटेर नयाँ मस्यौदा तयार गर्ने जनाएको छ।
विधेयक तयारीका क्रममा सरोकारवालाको वास्तविक आवश्यकता र सुझाव पहिचान गर्न मन्त्रालयले यसअघि नै सातै प्रदेशमा नीति संवादसमेत सञ्चालन गरिसकेको छ। ती संवादबाट प्राप्त सुझावलाई समेत नयाँ मस्यौदामा समेट्ने मन्त्रालयको तयारी छ।
Discussion about this post