धादिङ । पृथ्वी राजमार्गअन्तर्गत नागढुंगा–मुग्लिन सडकखण्डको कृष्णभीरमा नयाँ ट्र्याक खोल्ने काम सम्पन्न भएको छ। सरकारले आगामी असोज १ गतेदेखि उक्त सडकमा दुईतर्फी यातायात सञ्चालन गर्ने तयारी गरेको छ।
गत भदौ १० र १४ गते आएको बाढीले कृष्णभीरको सुरक्षा पर्खालमा क्षति पुर्याएपछि सडक पूर्णरूपमा अवरुद्ध भएको थियो। त्यसपछि पूर्वाधार विकास मन्त्रालयको नेतृत्वमा सडक विभाग र नेपाल जियोटेक्निकल सोसाइटीका प्राविधिकले स्थलगत अध्ययन गरेका थिए।
प्राविधिकको सुझावअनुसार कृष्णभीरको पहाड काटेर करिब २५० मिटर लामो नयाँ ट्र्याक निर्माण गरिएको हो। भदौ १९ गतेदेखि रुख कटान सुरु गरी करिब ३५ मिटर उचाइ र २० मिटर भित्रसम्म पहाड काटेर ट्र्याक निर्माण गरिएको मन्त्रालयले जनाएको छ।
प्रधानमन्त्री वालेन्द्र शाहले भदौभित्र कृष्णभीरमा सडक सञ्चालनमा ल्याउने घोषणा गरेअनुसार भदौ २८ गतेदेखि परीक्षणका रूपमा यातायात सञ्चालन हुँदै आएको छ।
ट्र्याक निर्माणमा प्राविधिकसहित करिब ५० जनाले दैनिक १२ देखि १६ घण्टासम्म काम गरेका थिए। अहिले सडकमा ग्राभेल, नाली निर्माण तथा थप मजबुतीकरणको काम भइरहेको छ। बुधबारसम्म ग्राभेलको काम सम्पन्न गरी असोज १ गते बिहानदेखि दुईतर्फी यातायात सञ्चालन गर्ने सरकारको तयारी छ।
Discussion about this post