नयाँ दिल्ली । सुदूरपश्चिमेली नेपाली समाज भारतले भोटेकोशी बाढीपीडितको राहत तथा पुनःस्थापनाका लागि २ लाख ८ हजार रुपैयाँ सहयोग गरेको छ।
समाजले विभिन्न समिति तथा सदस्यबाट संकलन गरेको रकम प्रधानमन्त्री दैवी प्रकोप उद्धार कोषमा जम्मा गरेको हो।
समाजका केन्द्रीय अध्यक्ष महादेव भट्टले प्राकृतिक विपत्तिमा पीडितको साथमा उभिनु सबैको साझा मानवीय दायित्व भएको बताउँदै देश तथा विदेशमा रहेका नेपालीलाई आफ्नो क्षमताअनुसार सहयोग गर्न आग्रह गरेका छन्।
उनले प्रवासमा रहेका नेपालीहरूले मातृभूमिमा आइपरेको विपत्तिमा सहयोग जुटाउनु सकारात्मक रहेको उल्लेख गर्दै सहयोगको आकारभन्दा पीडितको दुःखमा साथ दिने भावना महत्वपूर्ण भएको बताए।
समाजका अनुसार राहत अभियानमा राज्य, जिल्ला र एरिया समितिका साथै समाजका सदस्यहरूको सहभागिता रहेको थियो। समाजले सहयोग अभियानमा सहभागी सबैलाई धन्यवाद दिँदै आगामी दिनमा पनि विपत्ति तथा मानवीय संकटका समयमा सामाजिक सेवाका कार्यलाई निरन्तरता दिने जनाएको छ।
Discussion about this post