परासी । रसुवाको भोटेकोशी नदीमा आएको विनाशकारी बाढीबाट प्रभावित नागरिकको राहत तथा पुनर्स्थापनाका लागि सर्वोत्तम सिमेन्टले १ करोड ११ लाख ११ हजार १ सय ११ रुपैयाँ सहयोग गरेको छ।
कम्पनीका सञ्चालकहरू दिवस नेउपाने, शशी नेउपाने, विमल सवर्थिमा र तेन्जिङ तामाङसहितको प्रतिनिधिमण्डलले अर्थमन्त्री स्वर्णिम वाग्लेलाई सहयोग रकमको चेक हस्तान्तरण गरेको उद्योगका महाप्रबन्धक नेत्रप्रसाद घिमिरेले जानकारी दिए।
उक्त रकम प्रधानमन्त्री दैवी प्रकोप उद्धार कोषमा जम्मा गरिएको कम्पनीले जनाएको छ।
चेक हस्तान्तरण गर्दै सञ्चालक शशी नेउपानेले विपत्तिको कठिन घडीमा प्रभावित नागरिकलाई सहयोग गर्नु सबैको साझा दायित्व भएको बताए। उनले विपद्का बेला निजी क्षेत्र पनि नागरिकको साथमा उभिनुपर्ने मान्यताअनुसार सहयोग गरिएको उल्लेख गरे।
सर्वोत्तम सिमेन्टले यसअघि पनि देशमा आइपरेका विभिन्न प्राकृतिक तथा स्वास्थ्यसम्बन्धी विपत्तिमा सहयोग गर्दै आएको जनाएको छ। महाभूकम्प, कोरोना महामारीलगायतका संकटका समयमा पनि कम्पनीले आर्थिक तथा मानवीय सहयोग उपलब्ध गराएको दाबी गरेको छ।
Discussion about this post