आज ‘जेन्जी’ सहिद दिवस, देशभर सार्वजनिक बिदा

काठमाडौं । ‘जेन्जी’ आन्दोलनका क्रममा ज्यान गुमाएका युवाको सम्झनामा आज ‘जेन्जी’ सहिद दिवस मनाइँदै छ। दिवसका अवसरमा सरकारले देशभर सार्वजनिक बिदा दिएको छ।

गत वर्ष भदौ २३ गते भएको ‘जेन्जी’ आन्दोलनले नेपालको राजनीतिक घटनाक्रममा ठूलो परिवर्तन ल्याएको थियो। आन्दोलनपछि तत्कालीन सरकार विघटन भएको थियो भने पूर्वप्रधानन्यायाधीश सुशीला कार्कीको नेतृत्वमा चुनावी सरकार गठन गरिएको थियो।

आन्दोलनका क्रममा ज्यान गुमाएका युवाको योगदान र बलिदानको स्मरण तथा सम्मानस्वरूप सरकारले भदौ २३ गतेलाई ‘जेन्जी’ सहिद दिवसका रूपमा मनाउने निर्णय गरेको हो।

मन्त्रिपरिषद्को भदौ १८ गते बसेको बैठकले ‘जेन्जी’ सहिद दिवसका अवसरमा आज देशभर सार्वजनिक बिदा दिने निर्णय गरेको थियो।

दिवसका अवसरमा आन्दोलनका क्रममा ज्यान गुमाएका युवाप्रति श्रद्धाञ्जली अर्पण गर्दै घाइते तथा प्रभावित परिवारप्रति सम्मान र समवेदना व्यक्त गरिएको छ।