काठमाडौं । नेपाली कांग्रेस संसदीय दलको बैठक आज (सोमबार) बस्दैछ। बैठक बिहान ११ बजे सिंहदरबारस्थित नेपाली कांग्रेस संसदीय दलको कार्यालयमा बस्ने भएको छ।
संसदीय दलको कार्यालयका अनुसार बैठकमा मुलुकको पछिल्लो राजनीतिक अवस्था, संसद्मा पार्टीको भूमिका तथा आगामी संसदीय रणनीतिबारे छलफल हुनेछ।
बैठकमा पछिल्ला राजनीतिक घटनाक्रमसँगै जनसरोकारका समसामयिक विषयमाथि पनि छलफल हुने बताइएको छ। यस्तै, प्राकृतिक विपद्का कारण उत्पन्न परिस्थितिबारे समीक्षा गर्दै प्रभावित नागरिकको उद्धार, राहत तथा पुनःस्थापनासम्बन्धी विषयमा समेत कांग्रेसको भूमिकाबारे छलफल हुन सक्ने जनाइएको छ।
बैठकले संसद्मा नेपाली कांग्रेसले आगामी दिनमा खेल्ने भूमिका तथा विभिन्न राष्ट्रिय मुद्दामा पार्टीको धारणा थप स्पष्ट गर्ने अपेक्षा गरिएको छ।
संसद्को आगामी गतिविधि र सरकारका कामकारबाहीका विषयमा पार्टीले अपनाउने रणनीतिबारे पनि बैठकमा छलफल हुने कांग्रेस संसदीय दलको कार्यालयले जनाएको छ।
Discussion about this post