धनगढी । सुदूरपश्चिम प्रदेश सरकारले रसुवाको भोटेकोसी बाढी प्रभावितको राहत, उद्धार तथा खोजी कार्यका लागि २ करोड रुपैयाँ सहयोग गर्ने निर्णय गरेको छ ।
शुक्रबार मुख्यमन्त्री खगराज भट्टको अध्यक्षतामा बसेको मन्त्रिपरिषद् बैठकका निर्णयबारे उद्योग, पर्यटन, वन तथा वातावरणमन्त्री एवम् प्रदेश सरकारका प्रवक्ता प्रकाश रावलले जानकारी दिनुभयो । उहाँका अनुसार सरकारले प्रधानमन्त्री दैवी प्रकोप उद्धार कोषमा २ करोड रुपैयाँ उपलब्ध गराउने निर्णय गरेको छ ।
बाढी प्रभावित क्षेत्रमा घाइते तथा बिरामीको उपचारका लागि स्वास्थ्य टोली पठाउने निर्णयसमेत बैठकले गरेको छ । यसैगरी, प्रदेश सरकारका मन्त्रीहरूले आफ्नो एक महिनाको तलब रसुवा बाढीपीडितको राहतका लागि सहयोग गर्ने निर्णय गरेको उहाँले बताउनुभयो।
त्यस्तै बैठकले प्रदेश नीति तथा योजना आयोगको उपाध्यक्षमा गोकर्ण प्रकाश भट्ट तथा सदस्यमा गंगादत्त जोशी र हिरा चन्दलाई नियुक्त गर्ने निर्णयसमेत गरेको छ।
Discussion about this post