काठमाडौं । मधेशको राजनीतिमा लामो समयदेखि सक्रिय रहँदै आएका मनिष कुमार मिश्र पछिल्लो समय नेपाली कांग्रेसलाई मधेशमा पुनः बलियो राजनीतिक शक्तिका रूपमा स्थापित गर्ने अभियानमा सक्रिय भएका छन्।
मिश्रले आफ्नो राजनीतिक यात्रा मधेशवादी राजनीतिबाट सुरु गरेका थिए। तत्कालीन तराई–मधेश लोकतान्त्रिक पार्टी (तमलोपा) हुँदै राजपा, जनता समाजवादी पार्टी नेपाल र लोकतान्त्रिक समाजवादी पार्टी नेपालमा विभिन्न जिम्मेवारी सम्हाल्दै आएका मिश्र पछिल्लो समय नेपाली कांग्रेससँग जोडिएका हुन्।
मिश्रले सर्लाही–४ लाई आफ्नो राजनीतिक गतिविधिको मुख्य क्षेत्र बनाउँदै संगठन निर्माण तथा जनसम्पर्क विस्तार गर्दै आएका थिए। संघीय निर्वाचनमा प्रत्यक्षतर्फ उम्मेदवार बन्ने तयारी गरिरहेका बेला पार्टीले बाहिरबाट आएका उम्मेदवारलाई टिकट दिएपछि उनी असन्तुष्ट बनेका थिए।
त्यसपछि उनले सर्लाही–४ बाट नेपाली कांग्रेसका सभापति गगन कुमार थापाको उम्मेदवारीलाई समर्थन गर्दै कांग्रेससँग राजनीतिक सहकार्य अघि बढाएका हुन्।
‘मधेश र कांग्रेसको सम्बन्ध पुनः बलियो बनाउनुपर्छ’
मिश्रका अनुसार मधेशमा कुनै समय नेपाली कांग्रेसको बलियो जनाधार रहेको थियो। तर मधेशका मुद्दाप्रति तत्कालीन नेतृत्वको दृष्टिकोणका कारण कांग्रेसको प्रभाव कमजोर भएको उनको बुझाइ छ।
पछिल्लो नेतृत्वले मधेशप्रतिको दृष्टिकोण परिवर्तन गरेको र मधेशका अधिकार तथा विकासका सवालमा कांग्रेस थप जिम्मेवार भएर अघि बढ्न थालेको विश्वासका आधारमा आफू कांग्रेसमा जोडिएको मिश्रको भनाइ छ।
वि.सं. २०८२ फागुन २ गते छतौना हाईस्कुलको प्रांगणमा आयोजित कार्यक्रममा मिश्रसहित लोसपा नेपाल र जसपा नेपालबाट आएका ठूलो संख्याका नेता तथा कार्यकर्ताले नेपाली कांग्रेस प्रवेश गरेका थिए।
नवप्रवेशीलाई जिम्मेवारी दिन समायोजन समिति
कांग्रेसमा प्रवेश गरेका नेता तथा कार्यकर्तालाई संगठनात्मक जिम्मेवारी व्यवस्थापन गर्न पार्टीले तीन सदस्यीय समायोजन समिति गठन गरेको छ। समितिको संयोजकमा अर्जुननरसिंह केसी तथा सदस्यमा उज्ज्वल प्रसाद बराल र प्रदीपराज शर्मा रहेका छन्।
समितिले नवप्रवेशीहरूको राजनीतिक पृष्ठभूमि, संगठनात्मक भूमिका तथा स्थानीय प्रभावका आधारमा जिम्मेवारी व्यवस्थापनको काम अघि बढाइरहेको छ।
मधेशका २२ जिल्लामा संगठन विस्तारको दाबी
हाल काठमाडौंमा रहेर मधेशमा कांग्रेसको संगठन विस्तार तथा सुदृढीकरणको गृहकार्य गरिरहेको मिश्रले बताएका छन्। उनका अनुसार मधेशका विभिन्न जिल्लाका नेता तथा कार्यकर्तासँग निरन्तर छलफल भइरहेको छ।
मिश्रले मेचीदेखि महाकालीसम्मको तराई–मधेश क्षेत्रमा कांग्रेसको संगठनलाई बलियो बनाउने लक्ष्य रहेको बताएका छन्।
उनका अनुसार मधेशका २२ जिल्लाबाटै प्रभावशाली नेता तथा कार्यकर्ता कांग्रेसमा प्रवेश गर्न इच्छुक छन्। समायोजन प्रक्रिया केही ढिलो भएका कारण तत्काल ठूलो संख्यामा पार्टी प्रवेश हुन नसकेको उनको दाबी छ।
युवालाई जोड्ने रणनीति
मिश्रले नयाँ पुस्ता तथा ‘जेनेरेसन–जी’ युवालाई कांग्रेसको राजनीतिक अभियानमा जोड्नुपर्नेमा पनि जोड दिएका छन्। परम्परागत राजनीतिक शैलीभन्दा फरक अपेक्षा राख्ने युवालाई पार्टीको संगठन र नेतृत्वसँग जोड्न नयाँ ढंगको राजनीतिक अभियान आवश्यक रहेको उनको भनाइ छ।
मिश्रका अनुसार अबको प्राथमिकता मधेशमा कांग्रेसको संगठन विस्तार, युवा पुस्तालाई पार्टीमा जोड्ने, मधेशका मुद्दालाई राष्ट्रिय राजनीतिमा प्रभावकारी रूपमा उठाउने तथा स्थानीय तहदेखि प्रदेश र संघसम्म पार्टीलाई बलियो बनाउने रहेको छ।
मिश्रको सक्रियतासँगै मधेशमा अन्य मधेशवादी दलका नेता–कार्यकर्तालाई कांग्रेसमा जोड्ने अभियानले गति लिने दाबी गरिएको छ। आगामी दिनमा हुने पार्टी प्रवेश र संगठनात्मक समायोजनले कांग्रेसको मधेश राजनीतिमा कस्तो प्रभाव पार्छ भन्ने विषय भने राजनीतिक वृत्तमा चासोको विषय बनेको छ।
Discussion about this post