फिफा विश्वकप फुटबलको प्रिक्वाटरफाइनलअन्तर्गत आज दुई रोमाञ्चक खेल हुँदैछन्। पहिलो खेलमा पाँच पटकको विश्वविजेता ब्राजिल र नर्वे राति पौने २ बजे अमेरिकाको न्युयोर्क–न्यु जर्सी रङ्गशालामा आमनेसामने हुनेछन्।
ब्राजिलले नकआउट चरणमा जापानलाई २–१ ले पराजित गर्दै अन्तिम १६ मा स्थान बनाएको हो भने नर्वेले आइभरी कोस्टलाई समान २–१ ले हराएको थियो। समूह चरणमा ब्राजिल ‘सी’ को विजेता र नर्वे ‘आई’ को उपविजेता बनेका थिए।
ब्राजिलविरुद्ध नर्वेको इतिहास भने बलियो छ। दुई टोलीबीच अहिलेसम्म ४ अन्तर्राष्ट्रिय खेल हुँदा नर्वे अपराजित रहेको छ। नर्वेले सन् १९९७ को मैत्रीपूर्ण खेल ४–२ तथा १९९८ को विश्वकपमा २–१ ले जितेको थियो भने १९९८ र २००६ का दुई खेल १–१ को बराबरीमा सकिएका थिए।
चौथो पटक विश्वकप खेलिरहेको नर्वे पहिलो पटक क्वाटरफाइनल पुग्ने लक्ष्यमा हुनेछ भने ब्राजिल छैटौं उपाधितर्फ अघि बढ्ने योजनामा छ।
यस्तै, दोस्रो खेलमा मेक्सिको र इङ्ग्ल्यान्ड भोलि बिहान पौने ६ बजे मेक्सिको सिटी रङ्गशालामा भिड्नेछन्।
नकआउट चरणमा मेक्सिकोले इक्वेडरलाई २–० तथा इङ्ग्ल्यान्डले डीआर कङ्गोलाई २–१ ले हराउँदै अन्तिम १६ मा स्थान बनाएका हुन्। मेक्सिको समूह ‘ए’ को विजेता र इङ्ग्ल्यान्ड समूह ‘एल’ को विजेताका रूपमा प्रिक्वाटरफाइनलमा पुगेका हुन्।
विश्वकपमा यी दुई टोलीबीच दोस्रो पटक प्रतिस्पर्धा हुन लागेको हो। यसअघि सन् १९६६ को विश्वकपमा इङ्ग्ल्यान्डले मेक्सिकोलाई २–० ले पराजित गरेको थियो। समग्रमा दुवै टोलीबीच भएका ८ भेटमा इङ्ग्ल्यान्ड ५ खेलमा विजयी, मेक्सिको २ खेलमा विजयी हुँदा १ खेल बराबरीमा सकिएको छ।
Discussion about this post