कञ्चनपुरको लालझाडी गाउँपालिका ले आगामी आर्थिक वर्ष २०८३/०८४ का लागि रु. ४६ करोड ५ लाख ९ हजार बराबरको वार्षिक बजेट तथा कार्यक्रम सर्वसम्मत रूपमा पारित गरेको छ। यो बजेट गत आर्थिक वर्षको रु. ४४ करोड २२ लाख ९२ हजार ९९६ को तुलनामा रु. १ करोड ८२ लाख १६ हजारले बढी अर्थात् करिब ४.१२ प्रतिशतले वृद्धि भएको हो।
गाउँसभाको बीसौँ अधिवेशनअन्तर्गत सोमबार सम्पन्न दोस्रो बैठकले बजेट, कार्यक्रम तथा सम्बन्धित विधेयकहरू सर्वसम्मतिले पारित गरेको हो। गाउँसभा अध्यक्ष निर्मल रानाले बैठकको उद्घाटन गर्दै पहिलो बैठकबाट स्वीकृत विनियोजन विधेयक २०८३ का सिद्धान्त र प्राथमिकताका आधारमा दोस्रो बैठकका कार्यसूची अघि बढाइएको जानकारी दिनुभयो।
गाउँकार्यपालिकाकी उपाध्यक्ष सपना चौधरी रानाले आगामी आर्थिक वर्षको आय–व्यय अनुमानसहितको बजेट तथा कार्यक्रम प्रस्तुत गर्नुभएको थियो। बजेटमाथि सदस्यहरूले विकास प्राथमिकता, स्रोत परिचालन र सेवा प्रवाहका विषयमा सुझाव राखेका थिए। प्राप्त सुझावलाई आवश्यक परिमार्जनमा समेट्दै बजेट सर्वसम्मत रूपमा पारित गरिएको जनाइएको छ।
गाउँपालिकाले आगामी आर्थिक वर्षका लागि कुल रु. ४६ करोड ५ लाख ९ हजार आय हुने प्रक्षेपण गरेको छ। आयतर्फ आन्तरिक स्रोतबाट रु. ८० लाख, संघीय वित्तीय समानीकरणबाट रु. ९ करोड ५३ लाख, संघीय सशर्त अनुदानबाट रु. १५ करोड ६० लाख, विशेष अनुदानबाट रु. १ करोड २० लाख, समपूरक अनुदानबाट रु. २ करोड २९ लाख तथा संघीय राजस्व बाँडफाँडबाट रु. ९ करोड ९९ लाख ४० हजार प्राप्त हुने अनुमान गरिएको छ।
त्यस्तै प्रदेश सरकारबाट समपूरक, विशेष, वित्तीय समानीकरण, सशर्त तथा राजस्व बाँडफाँडमार्फत विभिन्न शीर्षकमा प्राप्त हुने रकम समेत बजेटमा समावेश गरिएको छ।
व्ययतर्फ चालु खर्चका लागि रु. २५ करोड ७१ लाख ४९ हजार तथा पूँजीगत खर्चका लागि रु. २० करोड ३३ लाख ६० हजार विनियोजन गरिएको छ। सामाजिक सुरक्षा भत्ता सम्बन्धी बजेट भने यस बजेटमा समावेश गरिएको छैन।
बैठकले आगामी आर्थिक वर्षको बजेट कार्यान्वयनका लागि “विनियोजन विधेयक, २०८३” तथा कर, शुल्क र राजस्वका दर निर्धारणसम्बन्धी “आर्थिक विधेयक, २०८३” समेत सर्वसम्मत रूपमा पारित गरेको छ।
यसैबीच, न्यायिक समितिका संयोजक तथा उपाध्यक्ष सपना चौधरी रानाले स्थानीय सरकार सञ्चालन ऐन, २०७४ अनुसार चालु आर्थिक वर्षमा सम्पादन भएका विवाद निरूपण तथा मेलमिलापसम्बन्धी वार्षिक प्रतिवेदन प्रस्तुत गर्नुभएको थियो। प्रतिवेदनमाथिको छलफलपछि सभाले त्यसलाई समेत अनुमोदन गरेको छ।
गाउँपालिकाका प्रमुख प्रशासकीय अधिकृत राजबहादुर सार्कीका अनुसार आगामी बजेटमा लालझाडीको केरा उत्पादनलाई ब्रान्डिङ गर्ने, युवामुखी स्टार्टअप कर्जा कार्यक्रम सञ्चालन गर्ने, अधुरा योजनाहरू सम्पन्न गर्ने तथा गाउँपालिकाको नयाँ प्रशासकीय भवन निर्माणलाई तीव्रता दिने कार्यक्रम समावेश गरिएको छ।
Discussion about this post