कञ्चनपुर । कञ्चनपुर जिल्ला फुटबल संघले सुदूरपश्चिमका विभिन्न जिल्लाका युवाहरूलाई एन्फा कम्युनिटी कोर्षको प्रशिक्षण दिएको छ। संघले सुदूरपश्चिम प्रदेशका बाजुरा, डोटी, कैलाली र कञ्चनपुरका गरी ४३ जना युवाहरूलाई प्रशिक्षक प्रशिक्षण प्रदान गरेको हो।
असार १ गतेदेखि ४ गतेसम्म चलेको प्रशिक्षणमा एन्फा अन्तर्गतका कोचिङ सम्बन्धी आधारभूत ज्ञान र सीप सिकाइएको थियो। प्रशिक्षण पाएसँगै सुदूरपश्चिम क्षेत्रमा फुटबल खेलको विकासका लागि थप ४३ जना युवा प्रशिक्षक तयार भएका छन्।
प्रशिक्षण तालिमको समापनमा बोल्दै प्रमुख अतिथि एवम् चाँदनी नगरपालिकाका नगरप्रमुख किशोरकुमार लिम्बुले युवाहरूलाई अनुशासित, मर्यादित र दक्ष बनाउन खेलकुद सबैभन्दा बलियो माध्यम भएको बताउनुभयो। उहाँले सुदूरपश्चिमको पहिचान र प्रतिष्ठा जोगाउन मैदानमा प्राविधिक रूपमा सबल जनशक्ति आवश्यक रहेको बताउँदै खेलकुद क्षेत्रको संस्थागत विकास र दिगो प्रवर्द्धनका लागि स्थानीय सरकार प्रतिबद्ध रहेको बताउनुभयो।
कञ्चनपुर जिल्ला फुटबल संघका अध्यक्ष गणेश बहादुर चन्दले कञ्चनपुरमा पहिलो पटक यस्तो प्रशिक्षण आयोजना गरिएको बताउनुभयो। यसले सुदूरपश्चिमको फुटबल क्षेत्रमा दक्ष र प्राविधिक रूपमा सक्षम प्रशिक्षक उत्पादन गर्न योगदान पुर्याउने विश्वास व्यक्त गर्दै उहाँले आगामी दिनमा पनि फुटबल खेलको विकास र प्रवर्द्धनका लागि यस्ता क्षमता अभिवृद्धि कार्यक्रमलाई निरन्तरता दिइने बताउनुभयो।
त्यस्तै सुदूरपश्चिम प्रदेश फुटबल संघका उपाध्यक्ष तेजबहादुर चन्दले नयाँ उत्पादन भएका प्रशिक्षकहरूले अब ग्रामीण तहसम्म पुगेर ‘ग्रासरुट’ देखि नै नयाँ खेलाडी पहिचान र उत्पादनमा लाग्नुपर्ने बताउनुभयो। उहाँले सुदूरपश्चिममा फुटबलको प्रचुर सम्भावना रहेकाले यहाँको खेल क्षेत्रलाई व्यावसायिक बनाउन नवउत्पादित प्राविधिक जनशक्तिको भूमिका महत्वपूर्ण हुने बताउनुभयो।
एन्फाका प्रशिक्षक सञ्जित सिंहले सहभागीहरूलाई प्रशिक्षण प्रदान गर्नुभएको थियो। तालिमको समापनमा प्रशिक्षार्थीहरूलाई प्रमाणपत्र वितरण गरिएको छ। सहभागीहरूले यस प्रशिक्षणबाट फुटबल प्रशिक्षकका रूपमा आवश्यक आधारभूत ज्ञान, सीप तथा नेतृत्व क्षमता विकास गर्न ठूलो सहयोग पुगेको बताएका छन्।
Discussion about this post