काठमाडौँ – सरकारको निर्णयअनुसार नयाँ शैक्षिक सत्रका लागि विद्यार्थी भर्ना कार्यक्रम आजदेखि औपचारिक रूपमा शुरू भएको छ । मन्त्रिपरिषद्को निर्णयअनुसार वैशाख १५ देखि भर्ना र वैशाख २१ गतेदेखि पठनपाठन सञ्चालन गर्ने व्यवस्था गरिएको हो । शिक्षा, विज्ञान तथा प्रविधि मन्त्रालय अन्तर्गतको शिक्षा तथा मानव स्रोत विकास केन्द्रले सोही निर्णयका आधारमा विद्यालयहरूलाई परिवर्तित शैक्षिक क्यालेन्डरअनुसार कार्यक्रम सञ्चालन गर्न निर्देशन दिएको छ । साथै चैत २३ गतेदेखि लागू गरिएको शनिबार र आइतबार दुई दिन सार्वजनिक बिदाको व्यवस्थालाई समेत कार्यान्वयन गर्न भनिएको छ ।
तर, संघीय सरकारको निर्णयसँग स्थानीय तहहरूको असहमति देखिँदा देशभर शैक्षिक गतिविधिमा एकरूपता भने देखिएको छैन । काठमाडौँ उपत्यका मेयर्स फोरमले वैशाख ११ गतेदेखि नै भर्ना अभियान शुरू गर्न र १५ गतेदेखि पठनपाठन सञ्चालन गर्न आग्रह गरेपछि कतिपय पालिकाले सोहीअनुसार अघि बढेका छन् ।
यसैबीच उपत्यकाभित्र तथा बाहिरका केही स्थानीय तहले सरकारको निर्णयभन्दा अगाडि नै भर्ना अभियान शुरू गरिसकेका छन् र आजदेखि नियमित कक्षा सञ्चालन गर्ने तयारी गरेका छन् । यसले अभिभावक, विद्यार्थी र विद्यालय व्यवस्थापनबीच अन्योलको अवस्था सिर्जना गरेको छ । विगतका वर्षहरूमा वैशाख २ गतेदेखि नै नयाँ शैक्षिक सत्र शुरू हुने अभ्यास रहे पनि यस वर्ष ढिलो गरी सत्र शुरू गरिएको हो । यद्यपि, केन्द्र र स्थानीय तहबीच समन्वय अभावका कारण एउटै समयमा भर्ना र पठनपाठन सञ्चालन हुन नसक्दा शिक्षा क्षेत्र प्रभावित बनेको छ ।
Discussion about this post