महेन्द्रनगर । सूर्योदय वोमी लघुवित्त वित्तीय संस्था लिमिटेड शाखा कार्यालय सिसैया, कञ्चनपुरको आयोजनामा एक दिने बाख्रा पालन सम्बन्धी तालिम सफलतापूर्वक सम्पन्न भएको छ।
संस्थाले आफ्ना ६५ जना सदस्यहरूको आयआर्जन वृद्धि गर्ने उद्देश्यले तालिम सञ्चालन गरेको जनाएको छ।
कार्यक्रमको सभाध्यक्ष संस्थाका सदस्य शान्ती मल्ल रहनुभएको थियो भने प्रमुख अतिथिका रूपमा वेदकोट नगरपालिका–६ का वडा अध्यक्ष तुलसी राना उपस्थित हुनुहुन्थ्यो। कार्यक्रममा बोल्दै वडा अध्यक्ष रानाले बाख्रा पालन ग्रामीण अर्थतन्त्रको महत्वपूर्ण आधार भएको उल्लेख गर्दै यस्ता सीपमूलक तालिमले कृषकलाई आत्मनिर्भर बनाउन ठूलो सहयोग पुग्ने बताउनुभयो।
उहाँले तालिमबाट प्राप्त ज्ञान र सीपलाई व्यवहारमा लागू गर्न सहभागीहरूलाई आग्रह गर्दै व्यवसायिक रूपमा बाख्रा पालनतर्फ अघि बढ्न प्रेरित गर्नुभयो। साथै आधुनिक प्रविधि र व्यवस्थापन अपनाएर बाख्रा पालन गर्दा राम्रो आम्दानी गर्न सकिने भएकाले महिलाहरूको समेत सक्रिय सहभागिता आवश्यक रहेको बताउनुभयो।
संस्थाका अनुगमन अधिकृत कविन्द्र शाहीले सदस्यहरूको आर्थिक सशक्तीकरणका लागि यस्ता तालिमहरू नियमित रूपमा सञ्चालन हुँदै आएको जानकारी दिनुभयो। उहाँका अनुसार कञ्चनपुर, कैलाली र बर्दिया जिल्लाका शाखामार्फत तरकारी तथा बाख्रा पालनसम्बन्धी तालिमहरू सञ्चालन भइरहेका छन्।
तालिममा सहभागी गोमती टमटाले बाख्रा पालनको महत्व, उन्नत जात छनोट, आहार व्यवस्थापन, खोर निर्माण, सरसफाइ तथा रोग पहिचान र उपचारसम्बन्धी उपयोगी ज्ञान प्राप्त भएको बताउनुभयो। उहाँले सिकेका सीप अन्य सदस्यहरूसँग पनि साझा गर्ने र व्यवसायिक रूपमा बाख्रा पालन गर्ने योजना रहेको उल्लेख गर्नुभयो।
अर्की सहभागी शान्ती चन्दले तालिम अत्यन्तै लाभदायक रहेको र नयाँ ज्ञान हासिल गर्न पाएको प्रतिक्रिया दिनुभयो।
कार्यक्रममा कृषि प्राविधिकहरूले सहजीकरण गर्दै व्यावहारिक प्रशिक्षण प्रदान गरेका थिए। संस्थाका प्रतिनिधिहरूले यस्ता सीपमूलक तालिमहरूले ग्रामीण क्षेत्रमा स्वरोजगार सिर्जना गर्नुका साथै आर्थिक सशक्तीकरणमा महत्वपूर्ण योगदान पुर्याउने विश्वास व्यक्त गरेका छन्।
साथै आगामी दिनमा पनि यस्ता कार्यक्रमलाई निरन्तरता दिने प्रतिबद्धता जनाइएको छ।
Discussion about this post