काठमाडौँ । त्रिभुवन विश्वविद्यालयले आफ्नो हाताभित्र रहेको क्रिकेट रंगशालासहित अतिक्रमित जग्गा खाली गर्न ३५ दिनको अल्टिमेटम दिएको छ । विश्वविद्यालयले गत वैशाख ४ गते सार्वजनिक सूचना जारी गर्दै सो अवधिभित्र सबै संरचना खाली गर्न आग्रह गरेको हो । सोही सूचनाअनुसार त्रिविले आफ्नो जग्गा प्रयोग गरिरहेका विभिन्न निकायलाई छुट्टाछुट्टै पत्राचार गरेको छ । नेपाल क्रिकेट संघलाई पनि पत्र पठाइएको छ । त्रिवि र क्यानबीचको सम्झौता यही वैशाख अन्तिममा सकिँदैछ ।
त्रिवि रजिस्ट्रार कार्यालयअन्तर्गत सामान्य प्रशासन महाशाखाका अनुसार अतिक्रमित जग्गा फिर्ता ल्याउने अभियानअन्तर्गत १८ वटा संघ–संस्थालाई ३५ दिनभित्र खाली गर्न निर्देशन दिइएको छ । यो निर्णय विश्वविद्यालयको जग्गा खोजबिन समितिको प्रतिवेदनका आधारमा गरिएको हो ।
त्रिविका एक पदाधिकारीका अनुसार ठूला खेलकुद कार्यक्रमका कारण लामो समयसम्म अध्ययन–अनुसन्धान प्रभावित भएको भन्दै यसपटक क्यानसँग सम्झौता नवीकरण नगर्ने तयारी गरिएको छ । यता क्यानका प्रवक्ता छुम्बी लामाले भने आफूहरूले औपचारिक पत्र नपाएको बताएका छन् । क्यानको बोर्ड बैठकले भने त्रिविसँगको करार अवधि थप गर्न राष्ट्रिय खेलकुद परिषद्मार्फत सरकारसँग पहल गर्ने निर्णय गरिसकेको छ ।
यसैबीच सरकारले त्रिवि क्रिकेट मैदानलाई अन्तर्राष्ट्रियस्तरको रंगशालाका रूपमा विकास गर्ने गुरुयोजना स्वीकृत गरिसकेको छ । उक्त योजना अनुसार रंगशाला निर्माणका लागि करिब १० अर्ब रुपैयाँ लाग्ने अनुमान गरिएको छ । तर त्रिविले मैदान खाली गर्न निर्देशन दिएपछि निर्माण प्रक्रिया अन्योलमा परेको छ । त्रिविको प्रतिवेदनअनुसार कीर्तिपुर क्षेत्रमा मात्रै करिब एक हजार रोपनी जग्गा अतिक्रमण भएको देखिएको छ । अतिक्रमणमा संलग्नमाथि कारबाहीका लागि अख्तियार दुरुपयोग अनुसन्धान आयोग, केन्द्रीय अनुसन्धान ब्यूरो र जिल्ला प्रशासन कार्यालयलाई सिफारिस गरिएको छ ।
Discussion about this post