कञ्चनपुर । भीमदत्त नगरपालिकामा महिला सशक्तिकरणका क्षेत्रमा सञ्चालित ‘इम्पावरिङ हर’ (महिला सशक्तिकरण) कार्यक्रमको प्रगति समीक्षा बैठक सम्पन्न भएको छ। कोइकाको आर्थिक सहयोग तथा अक्सफाम नेपालको प्राविधिक सहयोगमा निड्स नेपालद्वारा सञ्चालित यस कार्यक्रमले नगरपालिकाका १९ वटै वडाका महिलाहरूलाई आत्मनिर्भरता र नेतृत्वतर्फ डोर्याएको छ।
समीक्षा बैठकमा भीमदत्त नगरपालिकामा गठित २० वटा महिला सशक्तिकरण केन्द्रमा आबद्ध ५ सय ८३ जना महिला सदस्यहरूले समुदायमा गरेका कार्यहरू र त्यसबाट प्राप्त नतिजाहरूका बारेमा छलफल गरिएको थियो। कार्यक्रमले महिलाहरूको नेतृत्व विकास, क्षमता अभिवृद्धि, र सीपमूलक तालिममार्फत स्वरोजगार सिर्जनामा महत्वपूर्ण भूमिका खेलेको निड्स नेपालले जनाएको छ।
समीक्षाका कार्यक्रममा महिलाहरूले समुदाय र अन्य निकायमा नेतृत्व गर्दा भोगेका चुनौती र प्राप्त अवसरहरूबारे आफ्ना अनुभवहरू साझा गरेका थिए।
कार्यक्रममा बोल्दै भीमदत्त नगरपालिकाकी उपप्रमुख निलम लेखकले यो कार्यक्रमले महिला दिदीबहिनीहरूलाई आत्मनिर्भर र कुशल नेतृत्वकर्ता बनाएको बताउनुभयो। उहाँले अनुगमनका क्रममा महिलाहरूमा देखिएको सकारात्मक परिवर्तन र आत्मविश्वासले कार्यक्रमको प्रभावकारिता पुष्टि गरेको उल्लेख गर्नुभयो।
निड्स नेपालका कार्यकारी निर्देशक भवराज रेग्मीले कार्यक्रमको आगामी कार्यदिशाका लागि सरोकारवालाहरूबाट सल्लाह र सुझावको अपेक्षा गर्नुभयो। त्यस्तै कार्यक्रम संयोजक नवीन भट्टले यस अभियानले समुदायका महिलाहरूलाई नेतृत्वदायी भूमिकामा आउन थप उत्साहित बनाएको जानकारी दिनुभयो।
कार्यक्रममा सहभागी भीमदत्तका विभिन्न वडाका वडा अध्यक्षहरूले महिला सशक्तिकरण केन्द्रहरूले वडा स्तरमा गरेको कामको प्रशंसा गर्दै यसलाई निरन्तरता दिनुपर्नेमा जोड दिएका छन्।
Discussion about this post