काठमाडौं । नेपाल सरकार ले सरकारी कार्यालय तथा शैक्षिक संस्थाहरूमा साताको दुई दिन बिदा दिने निर्णय गरेको छ । आइतबार बसेको मन्त्रिपरिषद्को बैठकले पेट्रोलियम पदार्थको आपूर्तिमा देखिएको असहजतालाई मध्यनजर गर्दै आगामी चैत २३ गतेदेखि लागू हुने गरी शनिबार र आइतबार सार्वजनिक बिदा दिने निर्णय गरेको हो । सरकारका प्रवक्ता एवं शिक्षामन्त्री सस्मित पोखरेल का अनुसार बिदा थपिएसँगै कार्यालय समय पनि परिमार्जन गरिएको छ । अब सरकारी कार्यालयहरू बिहान ९ बजेदेखि साँझ ५ बजेसम्म सञ्चालन हुनेछन्, भने शैक्षिक संस्थाहरूको हकमा उक्त समय लागू हुने छैन ।
बैठकले अर्थ मन्त्रालयअन्तर्गत ‘डिजिटल नेपाल ट्रान्सफरमेसन प्रोजेक्ट’ का लागि एसियाली विकास बैंक बाट ४० मिलियन र विश्व बैंक बाट ५० मिलियन अमेरिकी डलर गरी कुल ९० मिलियन अमेरिकी डलर बराबरको सहुलियतपूर्ण ऋण स्वीकार गर्ने निर्णय पनि गरेको छ । त्यस्तै, ‘दिगो र समावेशी वित्त परियोजना’ का लागि विश्व बैंकबाट प्राप्त हुने ९५ मिलियन अमेरिकी डलर बराबरको ऋण स्वीकार गर्ने निर्णय समेत गरिएको छ ।
यसैगरी, संघीय मामिला तथा सामान्य प्रशासन मन्त्रालय को प्रस्तावमा सबै मन्त्रालय, सचिवालय, आयोग तथा अन्तर्गतका निकायहरूको संगठन तथा व्यवस्थापन सर्वेक्षण गर्न पूर्वस्वीकृति दिइएको छ । साथै राष्ट्रिय समाचार समिति का कार्यकारी अध्यक्ष धर्मेन्द्र झा ले दिएको राजीनामा स्वीकृत गरिएको प्रवक्ता पोखरेलले जानकारी दिनुभयो ।
सरकारले वातावरण संरक्षण तथा इन्धन खपत घटाउने उद्देश्यले डिजेल तथा पेट्रोल सवारीलाई विद्युतीय सवारीमा रूपान्तरण गर्न आवश्यक कानुनी व्यवस्था मिलाउने निर्णय पनि गरेको छ । त्यसैगरी, आगामी शैक्षिक सत्र २०८३ वैशाख १५ गतेदेखि सुरु गर्ने निर्णय गरिएको छ । मन्त्रीहरूको सम्पत्ति विवरण सार्वजनिक गर्ने विषयमा भने आगामी मन्त्रिपरिषद् बैठकमा निर्णय गरिने जनाइएको छ ।
Discussion about this post