काठमाडौं – पूर्व राष्ट्रपति विद्यादेवी भण्डारीले पूर्वप्रधानमन्त्री केपी शर्मा ओली र पूर्व गृहमन्त्री रमेश लेखकको पक्राउलाई सरकारको अपरिपक्व निर्णय भएको टिप्पणी गरेकी छन्। शनिबार जारी प्रेस विज्ञप्तिमा उनले उक्त कदमले दूरगामी प्रभाव पार्ने र देशमा अस्थिरताको जोखिम बढाउन सक्ने भन्दै चिन्ता व्यक्त गरेकी हुन्।
उनले कार्की आयोगको प्रतिवेदन नै पूर्ण नभएको सन्दर्भमा सरकार गठन भएको पहिलो दिनमै त्यसको कार्यान्वयन गर्दै ओली र लेखकलाई पक्राउ गरिनु अत्यन्त संवेदनशील विषय भएको उल्लेख गरेकी छन्। यस्तो निर्णय वर्तमान संविधान, प्रचलित कानुन तथा स्थापित लोकतान्त्रिक अभ्याससँग मेल नखाने उनको भनाइ छ।
विज्ञप्तिमा कुनै पनि जाँचबुझ आयोगको प्रतिवेदन कार्यान्वयन गर्दा विधिसम्मत प्रक्रिया, पर्याप्त अध्ययन तथा संस्थागत परामर्श आवश्यक हुने उल्लेख गरिएको छ। हतारमा गरिएको निर्णयले विधिको शासनप्रति जनविश्वास कमजोर बनाउन सक्ने र मुलुकमा पुनः द्वन्द्व तथा अस्थिरता बढाउने जोखिम रहने चेतावनी दिइएको छ।
सुशासनलाई मुख्य एजेन्डा बनाएर गठन भएको वर्तमान सरकारबाट यस्तो कदम चालिनु दुःखद भएको जनाउँदै उनले लोकतान्त्रिक मूल्य–मान्यता र संवैधानिक मर्यादाको सम्मान गर्दै निर्णय पुनर्विचार गरी फिर्ता लिन सुझाव दिएकी छन्। साथै, उनले सरकारलाई संयमता अपनाएर विधि र प्रक्रियाअनुसार अघि बढ्न तथा मुलुकको स्थायित्व र लोकतान्त्रिक प्रणालीको संरक्षणमा गम्भीर हुन आग्रह गरेकी छन्।
Discussion about this post