अदालतको अन्तिम फैसला नआउँदासम्म महाधिवेशनमा जादैनौँः देउवा पक्ष

काठमाडौँ – नेपाली कांग्रेसभित्रको आन्तरिक विवाद फेरि चर्किँदै गएको छ। निवर्तमान सभापति शेरबहादुर देउवा पक्षले पार्टीको आधिकारितासम्बन्धी मुद्दा सर्वोच्च अदालतमा विचाराधीन रहेकाले नियमित महाधिवेशन गर्न नहुने स्पष्ट पारेको छ। विशेष महाधिवेशनबाट निर्वाचित केन्द्रीय कार्यसमितिले नियमित महाधिवेशनको कार्यतालिका प्रस्ताव गरेकै दिन देउवा पक्षका नेता श्यामकुमार घिमिरेले अदालतको अन्तिम फैसला नआउँदासम्म महाधिवेशनमा जाने पक्षमा आफूहरू नरहेको बताउनुभयो।

घिमिरेले अदालतको निर्णयपछि जसले आधिकारिकता पाउँछ, त्यसैको नेतृत्वमा महाधिवेशन सम्पन्न गरेर अघि बढ्नुपर्ने धारणा राख्नुभयो। उहाँले पार्टीभित्र दुवै पक्ष एकताबद्ध हुनुपर्नेमा जोड दिँदै सर्वोच्च अदालतले छिटो निर्णय दिनुपर्ने आग्रहसमेत गर्नुभयो। “अदालतले लामो समयसम्म अन्योलमा राख्दा जनविश्वासमा असर पर्न सक्छ,” उहाँले भन्नुभयो, “फैसलापछि जुन पक्ष आधिकारिक हुन्छ, त्यसैको नेतृत्वमा महाधिवेशन हुनुपर्छ।”

नेता घिमिरेले पार्टीभित्र समन्वयको अभाव र देउवा पक्षलाई बेवास्ता गरिँदा हालैको निर्वाचनमा पार्टीले कमजोर नतिजा व्यहोर्नुपरेको आरोपसमेत लगाउनुभएको छ।