अफगानिस्तानको राजधानी काबुलमा पाकिस्तानले हवाई आक्रमण गरेको आरोप लागेको छ। अफगानिस्तानले लागूऔषध प्रयोगकर्ताको उपचार हुने अस्पताललाई लक्षित गरी आक्रमण गरिएको दाबी गरेको छ। स्थानीय सञ्चार माध्यमलाई उद्धृत गर्दै सीएनएनले जनाएअनुसार उक्त आक्रमणमा कम्तीमा ४०० जनाको ज्यान गएको छ भने २५० भन्दा बढी घाइते भएका छन्। पछिल्लो समय दुई देशबीच बढ्दो द्वन्द्वबीच भएको यो आक्रमणले अवस्था झन् गम्भीर बनेको संकेत गरेको छ।
सीमावर्ती क्षेत्रमा बारम्बार झडप भइरहेका बेला अफगानिस्तानभित्र हवाई आक्रमणका घटना बढ्दै गएको जनाइएको छ। स्थानीय सञ्चार माध्यमका अनुसार पाकिस्तानी वायुसेनाका लडाकु विमानले काबुलसहित अन्य क्षेत्रमा पनि निशाना बनाएका छन्।
तालिबान सरकारका प्रवक्ता जबीहुल्लाह मुजाहिद ले पाकिस्तानी सेनाले काबुलस्थित अस्पतालमा बम खसालेको आरोप लगाउँदै यसलाई मानवताविरुद्धको अपराध भनेका छन्। तर पाकिस्तानका प्रधानमन्त्री शहबाज शरीफ का प्रवक्ता मोशर्रफ जैदीले उक्त आरोप अस्वीकार गर्दै काबुलमा कुनै पनि अस्पताललाई निशाना नबनाइएको स्पष्ट पारेका छन्।
Discussion about this post