कञ्चनपुर: जिल्लाको बेदकोट नगरपालिकामा रहेको घटाल बहुमुखी क्याम्पसको दैजी परिसरमा सुदूरपश्चिमेली समाजको आयोजनामा गरिब तथा जेहेन्दार विद्यार्थीहरूलाई छात्रवृत्ति वितरण कार्यक्रम सम्पन्न गरिएको छ।
कार्यक्रमको अध्यक्षता क्याम्पसका अध्यक्ष नारायण दत्त बोहराले गर्नुभएको थियो भने प्रमुख अतिथिको रूपमा वेदकोट नगरपालिकाका नगर प्रमुख भोजराज बोहरा उपस्थित हुनु भयो। कार्यक्रमको सञ्चालन क्याम्पसका लेखापाल भरत साउदले गर्नुभएको थियो।
कार्यक्रमको सुरुवातमा क्याम्पस प्रमुख देवदत्त पन्तले स्वागत मन्तव्यका साथै क्याम्पसको हालको प्रगतिबारे जानकारी गराउँदै पाँच वर्षभित्र घटाल बहुमुखी क्याम्पसलाई सुदूरपश्चिमकै नमुना क्याम्पस बनाउने प्रतिबद्धता व्यक्त गर्नुभयो। त्यसैगरी नगर प्रमुख बोहराले क्याम्पसको समग्र विकासका लागि आवश्यक सहयोग गर्न आफू सधैं तत्पर रहने आश्वासन दिनुभयो।
क्याम्पस अध्यक्ष नारायण बोहराले अब वेदकोट नगरपालिकाभित्र कुनै पनि विद्यार्थी स्नातक तहमा पढ्नबाट बञ्चित हुन नपरोस् भन्ने उद्देश्यका साथ समाज र स्थानीय निकायबीच सहकार्यको महत्व औंल्याउनुभयो।
सो कार्यक्रममा वार्ड सदस्य उद्दवराज पनेरुले आफ्नो वडाबाट सधैं शैक्षिक क्षेत्रमा सहयोग रहिरहने बताउनुभयो। कार्यक्रमका सह–संयोजक उमेश जोशीले क्याम्पसको निरन्तर प्रगतिका लागि शुभकामना व्यक्त गर्दै आगामी दिनमा पनि सहयोग गर्ने प्रतिबद्धता जनाउनुभयो।
कार्यक्रममा विभिन्न सामाजिक अभियन्ता, विद्यार्थी, अभिभावक, पत्रकार तथा प्राध्यापकहरूको उल्लेखनीय सहभागिता रहेको थियो। साथै, सुदूरपश्चिमेली समाजका संस्थापक सदस्य र सचिव लागायत पदाधिकारी हरुको समेत उपस्थिति रहेको थियो।
कञ्चनपुर जिल्लाबाट केवल घटाल बहुमुखी क्याम्पसलाई रोजेर उक्त छात्रवृत्ति कार्यक्रम आयोजना गरिएको थियो।
यस कार्यक्रमको तयारी र सफल आयोजनामा धर्मराज पाण्डेयको उल्लेखनीय योगदान रहेको भन्दै क्याम्पस परिवारले हार्दिक धन्यवाद ज्ञापन गरेको छ।
Discussion about this post