काठमाडौँ। काठमाडौँ महानगरपालिकाका प्रमुख बालेन्द्र शाह (बालेन) ले हालै भएको आगलागीका घटनाहरू, विशेषगरी सिंहदरबारमा भएको आगलागीका विषयमा उठेका प्रश्नहरूको सामाजिक सञ्जालमार्फत जवाफ दिनुभएको छ। उहाँले आन्दोलनकारीको अवरोधका कारण दमकल समयमै सिंहदरबार पुग्न नसकेको स्पष्ट पार्दै महानगरको सम्पूर्ण टिम विषम परिस्थितिमा पनि उद्धार र व्यवस्थापनमा खटिएको दाबी गर्नुभएको छ।
बालेन शाहले आफ्नो पोस्टमा “सिंहदरबार जलाउने नै बालेन शाह हो!” र “यत्रो सिंहदरबार जल्दा काठमाडौँ महानगरको दमकल कहाँ गयो?” जस्ता प्रश्न र आरोपहरूको खण्डन गर्दै यो स्पष्टीकरण दिनु आवश्यक नभए पनि अफवाह फैलाउनेहरूलाई सम्बोधन गर्न लेखिएको बताउनुभएको छ।
प्रमुख शाहले भदौ २४ गतेको स्थितिलाई सम्झँदै उक्त दिन “राज्य” नै ठप्प रहेको र पूर्ण अराजक स्थिति सिर्जना भएको बताउनुभएको छ। उहाँका अनुसार सिंहदरबारदेखि व्यापारिक प्रतिष्ठान, व्यक्तिगत घरदेखि सार्वजनिक सम्पत्तिसम्म आगलागी भइरहेको थियो। सुरक्षा संयन्त्र र प्रहरी चौकी समेत जोगाउन नसकेको त्यो अवस्थामा महानगरको टिम भने आफ्नो दायित्वबाट पछि नहटेको उहाँको भनाइ छ।
उहाँले महानगरको टिम आगो निभाउन, घाइतेको उपचार, खाना, औषधि, रगत व्यवस्थापन, लास व्यवस्थापन, तथ्याङ्क सङ्कलन र सरोकारवाला निकायहरूसँगको समन्वयमा दिनरात खटिएको जानकारी दिनुभयो।
सिंहदरबारमा दमकल ढिला पुगेको आरोपको जवाफमा मेयर शाहले आन्दोलनकारीको अवरोधका कारण दमकल जान नसकेको प्रस्ट पार्नुभएको छ। उहाँले लेख्नुभएको छ, “सिंहदरबार जलेको लगत्तै दमकल जाने प्रयास गरेतापनि आन्दोलनकारीको अवरोधले गर्दा दमकल जान सकेको थिएन।”
उहाँले सिंहदरबारभित्रै रहेको नेपाली सेनाको दमकल ले समेत भीडले काम गर्न नदिएका कारण निभाउने प्रयास गर्न नसकेको उल्लेख गर्नुभएको छ। भीड अलिक शान्त हुनेबित्तिकै भदौ २४ गते राति ८:१५ बजेभित्रै काठमाडौँ महानगरको दमकल सिंहदरबार पुगेको उहाँले तथ्याङ्कसहित जानकारी दिनुभयो।
मेयर शाहले महानगरसँग ५ वटा दमकल (न्युरोडमा २, बालाजुमा २ र रामहिटीमा १) रहेको र ४४ जनाको जनशक्ति (१४ नगर प्रहरी र ३० सशस्त्र प्रहरी)ले ३ सिफ्टमा काम गरेको जानकारी दिनुभयो। उहाँले भदौ २३ गतेदेखि २८ गतेसम्म दमकल खटिएका स्थानहरूको लामो सूची प्रस्तुत गर्नुभयो।
२३ गते: संसद भवन अगाडी आगो लागेको एम्बुलेन्स, सुन्धारा र शान्तिनगर बिजुलीको पोलमा आगो निभाएको।
२४ गते: राति ८ बजेदेखि १ बजेसम्म विशाल बजार जनसेवा प्रहरी वृत्त, हिमालयन बैंक, राष्ट्रिय वाणिज्य बैंक बानेश्वर, नयाँ बसपार्कमा आगो निभाएको।
सिंहदरबारमा: २४ गते राति ८:१५ देखि ९:४५ सम्म, राति १:४५ देखि ३:०० बजेसम्म, २६ गते दिउँसो ३:३० देखि ६:५० सम्म र सोही दिन साँझ ५ बजेदेखि ६ बजेसम्म गरी पटकपटक आगो नियन्त्रणमा लिएको।
अन्य स्थानहरू: २५ गते संसद भवन र अख्तियार दुरुपयोग अनुसन्धान आयोगको कार्यालय, सर्वोच्च अदालत परिसर (जहाँ महत्वपूर्ण कागजपत्र बचाएको प्रमाण सुरक्षित रहेको दाबी), ट्राफिक प्रहरी कार्यालय, जिल्ला अदालत, भाटभटेनी (चुच्चेपाटी, नक्साल, कोटेश्वर, बालुवाटार), जिल्ला प्रशासन कार्यालय, यातायात व्यवस्था विभाग, शहरी विकास विभाग, हिलटन होटल लगायत ५५ भन्दा बढी स्थानमा दमकल पुगेको तथ्याङ्क उहाँले दिनुभएको छ।
उहाँले आगलागीको घटनापछि घाइतेको उपचार र लास व्यवस्थापनमा महानगरले निभाएको भूमिकाको पनि चर्चा गर्नुभयो। सङ्घीय सरकारले घोषणा गर्नुअघि नै महानगरभित्रका सम्पूर्ण अस्पताललाई निशुल्क उपचार का लागि समन्वय गरेको, आवश्यक औषधि, स्वास्थ्यकर्मी, रगत व्यवस्थापन गरेको र बिरामी तथा कुरुवाहरूका लागि निशुल्क खाना/खाजा व्यवस्थापन गरेको बताउनुभएको छ।
अभिभावक नभएका बिरामीहरूको उपचारमा महानगरको टिमले अभिभावकको जिम्मेवारी लिएको र अपरेशनको Informed Consent Form मा समेत नगर प्रहरीले हस्ताक्षर गरेको उहाँले उल्लेख गर्नुभएको छ। साथै, शहिदहरूको लास व्यवस्थापनका लागि परिवारको खानपिन, बस्ने व्यवस्था र नेपाली सेनासँगको सहकार्यमा लासलाई घरसम्म पुर्याउने व्यवस्था समेत महानगरले मिलाएको जानकारी दिनुभएको छ।
मेयर शाहले बिना तथ्य र डाटा विश्लेषण नगरी निष्कर्ष निकाल्ने विश्लेषकहरू र अफवाह फैलाउनेहरू सँग सचेत रहन जनतालाई आग्रह गर्नुभएको छ। उहाँले मिडियाका मित्रहरूलाई सत्य तथ्य खोजेर मात्र समाचार लेख्न र अफवाह नफैलाउन विशेष अनुरोध गर्नुभएको छ।
उहाँले जनतासँगको भरोसा, जिम्मेवारी र आपत्कालीन व्यवस्थापनका लागि महानगरको टिम सधैं खटिरहने प्रतिबद्धता व्यक्त गर्दै ‘जनताले सही जानकारी पाउने अधिकार राख्छन्’ भन्ने कुरामा जोड दिनुभएको छ।
Discussion about this post