कञ्चनपुर । अन्तर्राष्ट्रिय युवा दिवसको अवसर पारेर भीमदत्त नगरपालिकामा रहेको उत्थानशील युवा सञ्जालले सरसफाइ कार्यक्रम सम्पन्न गरेको छ। भीम वाटिका भित्र र बाहिरको परिसरमा गरिएको सरसफाइ कार्यक्रममा करिब ५० जनाको सहभागिता रहेको थियो।
सञ्जालका संयोजक उत्तम सुनारका अनुसार, सरसफाइ कार्यक्रममा भीमदत्त नगरपालिकाका नगर प्रहरी, फोहोर व्यवस्थापनका कर्मचारी, एनएनएसडब्लुएका प्रतिनिधि र सञ्जालका युवाहरूको सक्रिय सहभागिता थियो।
उत्थानशील युवा सञ्जालले सरसफाइका साथै जनचेतनामूलक कार्यक्रम पनि सञ्चालन गरेको छ। पार्कभित्र र बाहिरका व्यवसायीहरूलाई फोहोर व्यवस्थापनका लागि सचेत गराउँदै फोहोर नगर्न आग्रह गरिएको संयोजक सुनारले जानकारी दिनुभयो।
एनएनएसडब्लुएको सहजीकरणमा गठन भएको यो सञ्जालले यसअघि पनि विभिन्न जनचेतनामूलक कार्यहरू गर्दै आएको संस्थाकी सामाजिक परिचालक अनिता लावडले बताउनुभयो। यो सञ्जालले विपद् व्यवस्थापन, जलवायु परिवर्तन अनुकूलन, वातावरण संरक्षण, वृक्षारोपण र प्रकोप न्यूनीकरणजस्ता क्षेत्रमा पनि काम गर्ने उहाँले जानकारी दिनुभयो।
हाल उत्थानशील युवा सञ्जाल भीमदत्त नगरपालिकाका १९ वटै वडा र दोधारा चाँदनी नगरपालिकाका १० वटा वडामा गठन भइसकेको छ।
Discussion about this post