काठमाडौं । तराई–मधेससहित देशका विभिन्न भागमा श्रद्धा र भक्तिपूर्वक मनाइने छठ पर्वको दोस्रो दिन आज ‘खरना’ विधि गरिँदैछ। चार दिनसम्म मनाइने यस पर्वको दोस्रो दिन व्रतालुहरू निराहार उपवास बसेर खरना विधि पूरा गर्ने तयारीमा छन्।
खरना विधिअन्तर्गत व्रतालुहरूले बिहान स्नान गरी दिनभर निराहार व्रत बस्ने गर्छन्। साँझ सख्खरमा पकाइएको खीर तथा अन्य प्रसाद कुलदेवता र छठी मातालाई अर्पण गरी आफूले समेत प्रसाद ग्रहण गर्ने परम्परा रहेको छ। मैथिली भाषामा यस विधिलाई ‘खरना’ भनिन्छ।
यसअघि छठ पर्वको पहिलो दिन हिजो ‘नहाय–खाय’ विधि सम्पन्न गरिएको थियो। उक्त दिन व्रतालुहरूले स्नान गरी शुद्ध भोजन ग्रहण गर्दै छठ व्रतको सङ्कल्प गर्ने परम्परा छ।
छठ पर्वको तेस्रो दिन भोलि व्रतालुहरू निराहार व्रत बसेर साँझ नजिकैको नदी, पोखरी तथा जलाशयमा निर्माण गरिएका घाटमा पुग्नेछन्। त्यहाँ अस्ताउँदो सूर्यलाई पहिलो अर्घ्य अर्पण गरी सूर्यदेवको पूजा–आराधना गरिनेछ।
त्यसैगरी, पर्वको चौथो तथा अन्तिम दिन सप्तमी तिथिमा बिहान उदाउँदो सूर्यलाई दोस्रो अर्घ्य दिएपछि छठ पर्व विधिवत् रूपमा सम्पन्न हुनेछ।
सूर्यदेव र छठी माताको उपासना गरिने यस पर्वमा श्रद्धा, निष्ठा, आत्मशुद्धि र समर्पणलाई विशेष महत्त्व दिइन्छ। पछिल्ला वर्षहरूमा छठ पर्व तराई–मधेसमा मात्र सीमित नरही काठमाडौं उपत्यकालगायत देशका विभिन्न क्षेत्रमा समेत धुमधामका साथ मनाउन थालिएको छ।
छठ पर्वको अवसरमा सरकारले पर्सि सोमबार सार्वजनिक बिदासमेत दिएको छ।
Discussion about this post