काठमाडौं । नेपाल प्रिमियर लिग (एनपीएल) को तेस्रो संस्करणअन्तर्गत लिग चरणको २४औँ खेलमा काठमाडौं गोर्खाजलाई ७ रनले पराजित गर्दै सुदूरपश्चिम रोयल्स प्लेअफमा प्रवेश गरेको छ। यससँगै सुदूरपश्चिम प्लेअफमा स्थान बनाउने दोस्रो टोली बनेको छ।
कीर्तिपुरस्थित त्रिवि क्रिकेट मैदानमा टस हारेर पहिले ब्याटिङ गरेको सुदूरपश्चिम रोयल्सले निर्धारित २० ओभरमा ६ विकेट गुमाउँदै १२५ रन बनाएको थियो। जवाफमा १२६ रनको लक्ष्य पछ्याएको काठमाडौं गोर्खाजले निर्धारित २० ओभरमा ७ विकेट गुमाएर ११८ रन मात्रै बनाउन सक्यो।
काठमाडौंका लागि रासिद खानले सर्वाधिक ३५ रन बनाए। उनले ३१ बलमा ५ चौका प्रहार गरे। त्यसैगरी दुसान हेमन्थाले २१, साम ह्याज्लेटले ११ र सन्तोष यादवले १० रन बनाए। अन्य ब्याटरले उल्लेखनीय प्रदर्शन गर्न सकेनन्।
सुदूरपश्चिमका बलर अनिल खरेलले २ विकेट लिए भने स्कट कुगेलेइन, हेमन्त धामी र फाबियन एलनले समान १ विकेट हात पारे।
त्यसअघि ब्याटिङ गरेको सुदूरपश्चिमका लागि कप्तान दीपेन्द्रसिंह ऐरीले उत्कृष्ट अर्धशतकीय पारी खेले। उनले ५४ बलमा ५ चौका र २ छक्कासहित सर्वाधिक ६० रन बनाए।
सुरुवाती ब्याटरहरू सस्तैमा आउट भएपछि दबाबमा परेको सुदूरपश्चिमको इनिङ्सलाई दीपेन्द्र र आरिफ शेखको साझेदारीले सम्हालेको थियो। आरिफले १६ रन बनाए। त्यस्तै थारिन्दु रत्नायके २६ रनमा अविजित रहे भने फाबियन एलनले २ रन बनाए।
काठमाडौंका लागि जहानदाद खानले ३ तथा सन्तोष यादवले २ विकेट लिए।
यस जितसँगै सुदूरपश्चिम रोयल्सले प्लेअफमा आफ्नो स्थान सुरक्षित गरेको छ। लिग चरणको अन्तिम खेलमा अब काठमाडौं गोर्खाजले पोखरा एभेन्जर्ससँग प्रतिस्पर्धा गर्नेछ।
Discussion about this post