काठमाडौं । रुस र युक्रेन रुसको नियन्त्रणमा रहेको युक्रेनी सहर ओलेस्कीमा युद्धविराम लागू गर्न तथा आगामी महिना शान्ति वार्ता अघि बढाउन सहमत भएका छन्। अमेरिकी प्रथम महिला मेलानिया ट्रम्पको कूटनीतिक मध्यस्थतामा भएको भनिएको सहमतिअनुसार अक्टोबर २७ देखि युद्धविराम लागू हुनेछ।
दक्षिण युक्रेनको खेरसोन नजिकै रहेको ओलेस्की सहरमा युद्धअघि करिब २४ हजार मानिस बसोबास गर्थे। तर, अहिले त्यहाँ १ हजार ७०० देखि २ हजारसम्म सर्वसाधारण मात्र बाँकी रहेको ह्वाइट हाउसले जनाएको छ। सहरमा खाद्यान्न, औषधि र स्वच्छ पानीको अभाव रहेको बताइएको छ।
युद्धविराम अवधिमा बारुदी सुरुङ हटाउने, राहत सामग्री वितरण गर्ने र सर्वसाधारणलाई सुरक्षित स्थानमा सार्ने काम गरिने जनाइएको छ।
युक्रेनी राष्ट्रपति भोलोडिमिर जेलेन्स्कीले पनि लामो समयदेखि अवरुद्ध शान्ति वार्ता पुनः सुरु गर्ने तयारी भइरहेको बताएका छन्। आगामी नोभेम्बरको पहिलो आधामा युक्रेन, रुस र अमेरिकाका प्रतिनिधिबीच संयुक्त अरब इमिरेट्सको आबु धाबी वा स्विट्जरल्यान्डमा वार्ता हुन सक्ने बताइएको छ।
यद्यपि, क्षेत्रीय नियन्त्रण, युक्रेनको सुरक्षा प्रत्याभूति र सैन्य सहयोगजस्ता विषयमा दुवै पक्षबीच मतभेद कायम छन्। आगामी वार्ताले लामो समयदेखि जारी युद्ध अन्त्य गर्ने दिशामा प्रगति गर्छ कि गर्दैन भन्ने चासो बढेको छ।
Discussion about this post