काठमाडौं । मलेसियाका लागि प्रस्तावित नेपाली राजदूत चुडामणि खरेलको संसदीय सुनुवाइ प्रक्रिया स्थगित भएको छ। बुधबार बसेको संसदीय सुनुवाइ समितिको बैठकमा उनीमाथि विभिन्न प्रश्न उठेपछि सुनुवाइ प्रक्रिया अघि नबढाइएको हो।
बैठकमा सत्तारूढ राष्ट्रिय स्वतन्त्र पार्टी (रास्वपा) का सांसद मधुकुमार चौलागाईं र राजीव खत्रीले खरेलमाथि स्वार्थको द्वन्द्व, आर्थिक अनियमितता, म्यानपावर व्यवसायीसँगको सम्बन्ध तथा योग्यतासम्बन्धी प्रश्न उठाएका थिए।
समिति सभापति बोधनारायण श्रेष्ठले उनीमाथि उठेका विषयमा थप अध्ययन गर्नुपर्ने भएकाले सुनुवाइ केही समयका लागि स्थगित गरिएको जानकारी दिए।
बैठकमा प्रस्तावित राजदूत खरेलले भने आफूमाथि लगाइएका आरोप तथ्यहीन र प्रमाणविहीन रहेको दाबी गरेका थिए। उनले आफूले कसैसँग आर्थिक लेनदेन नगरेको र अनुदान मिलाइदिने आश्वासनसमेत नदिएको बताएका थिए। पोखराको जग्गासम्बन्धी विषयमा पनि आफूलाई जानकारी नभएको उनको भनाइ थियो।
यसअघि असोज २ गते बसेको मन्त्रिपरिषद् बैठकले विभिन्न १३ मुलुकका लागि राजदूत सिफारिस गरेको थियो। सोही सिफारिसअनुसार संसदीय सुनुवाइ प्रक्रिया अघि बढाइएको हो।
Discussion about this post