काठमाडौं । नेपाल प्रिमियर लिग (एनपीएल) को तेस्रो संस्करणका लागि विराटनगर किंग्सले श्रीलंकाका पूर्व अन्तर्राष्ट्रिय क्रिकेटर धम्मिका प्रसादलाई प्रशिक्षकमा पुनः नियुक्त गरेको छ।
तीव्र गतिका बलर प्रसादले श्रीलंकाका लागि २५ टेस्ट, २४ एकदिवसीय र १४ टी–२० अन्तर्राष्ट्रिय खेल खेलेका छन्। उनले अमेरिका, नेपाल र ओमानका राष्ट्रिय क्रिकेट टोलीमा बलिङ प्रशिक्षकका रूपमा काम गरिसकेका छन्।
बलिङ प्रशिक्षण, खेलाडी विकास र टोली व्यवस्थापनमा उनको अनुभवलाई ध्यानमा राख्दै विराटनगरले प्रशिक्षकका रूपमा निरन्तरता दिएको जनाएको छ। टोलीले विदेशी खेलाडीका रूपमा चरिथ असलंका र शुभम रञ्जनेलगायतलाई पनि अनुबन्ध गरिसकेको छ।
एनपीएलको तेस्रो संस्करण आगामी कात्तिक ९ देखि मंसिर ५ गतेसम्म आयोजना हुने तय भएको छ। प्रतियोगितालाई लक्षित गर्दै कीर्तिपुरस्थित त्रिवि अन्तर्राष्ट्रिय क्रिकेट मैदानको स्तरोन्नति, दर्शक प्यारापिटमा कुर्सी जडान, पिच तथा आउटफिल्ड व्यवस्थापन र प्रवेशद्वार निर्माणको काम भइरहेको छ।
प्रतियोगितामा दर्शकको चापलाई ध्यानमा राख्दै पार्किङ, प्रसारणका लागि आधुनिक सुविधासहितको कार्यकक्ष र सुरक्षा व्यवस्थापनको तयारीसमेत अघि बढाइएको छ।
Discussion about this post