सेयर बजारमा २० अंकको गिरावट

काठमाडौं । साताको पहिलो कारोबार दिन सोमबार सेयर बजारमा गिरावट आएको छ। नेप्से परिसूचक २०.४८ अंकले घटेर २,५६६.७६ विन्दुमा झरेर बन्द भएको हो।

यस दिन ३५९ वटा स्क्रिप्सको ९० लाख ३ हजार ३८८ कित्ता सेयर खरिद–बिक्री हुँदा कुल ३ अर्ब २७ करोड ९५ लाख ९ हजार ८३६ रुपैयाँ बराबरको कारोबार भएको छ।

कारोबारमा आएका कम्पनी तथा धितोपत्रमध्ये ३२ वटाको मूल्य बढेको छ भने २४२ वटाको मूल्य घटेको छ। ४ वटा स्क्रिप्सको मूल्य भने स्थिर रह्यो।

दोहोरो अंकले घटेको बजारमा कुनै पनि कम्पनीको सेयर सकारात्मक सर्किट लेभलमा कारोबार हुन सकेन। यस दिन १०.३० प्रतिशत स्ट्यान्डर्ड चार्टर्ड बैंक लिमिटेड डिबेन्चरको मूल्य सर्वाधिक ५.७५ प्रतिशतले बढेको छ।

कारोबार रकमका आधारमा घलेम्दी हाइड्रोपावर शीर्ष स्थानमा रह्यो। कम्पनीको करिब २२ करोड रुपैयाँ बराबरको सेयर कारोबार भएको छ। त्यस्तै, हाथवे इन्भेस्टमेन्ट नेपाल र शिवम् सिमेन्टको करिब ८–८ करोड रुपैयाँ बराबरको कारोबार भएको छ। हिमालयन डिस्टिलरी र पिपुल्स हाइड्रोपावरको पनि करिब ७–७ करोड रुपैयाँ बराबरको सेयर कारोबार भएको छ।

सोमबार ट्रेडिङ समूहको उपसूचकबाहेक बाँकी सबै समूहका उपसूचक नकारात्मक देखिएका छन्।