महेन्द्रनगर। कञ्चनपुरको भीमदत्त नगरपालिका–स्थित राना थारु होमस्टेमा तीन दिने प्रदेशस्तरीय पर्यावरणीय कृषि युवा सम्मेलन सुरु भएको छ।
युवालाई कृषिमा सक्षम तथा आत्मनिर्भर बनाउने र रैथाने जातका बीउबिजनको संरक्षण तथा प्रवर्द्धनका लागि आवश्यक ज्ञान र सीप प्रदान गर्ने उद्देश्यले सम्मेलन आयोजना गरिएको पर्यावरणीय कृषि युवा सञ्जालले जनाएको छ। सम्मेलनमा सुदूरपश्चिम प्रदेशका विभिन्न जिल्लाबाट कृषि युवा सञ्जालमा आबद्ध युवाहरुको सहभागिता रहेको छ।
सम्मेलनमा कृषि क्षेत्रमा विषादीको बढ्दो प्रयोग, त्यसबाट मानव स्वास्थ्य तथा वातावरणमा पर्ने असर र पर्यावरणीय कृषि प्रवर्द्धनका विषयमा छलफल भइरहेको छ। कृषि ज्ञान केन्द्र कञ्चनपुरका बाली संरक्षण प्राविधिक सत्यराज जोशीले करिब ८० प्रतिशत किसानले विषादीको गलत तरिकाले प्रयोग गरिरहेको बताउँदै पर्यावरणीय कृषि प्रवर्द्धनका लागि किसानको चेतनास्तर अभिवृद्धि गर्न आवश्यक रहेको बताउनुभयो।
उहाँले विषादीको उचित प्रयोग तथा त्यसले मानव स्वास्थ्य, माटो र वातावरणमा पार्ने असरबारे किसानलाई सचेत गराउनुपर्नेमा जोड दिनुभयो। साथै, आर्थिक वर्ष २०८२र८३ मा प्रदेश सरकारमार्फत सञ्चालित कार्यक्रमअन्तर्गत हिउँदे तथा वसन्ते बाली, तरकारी उत्पादन र जलवायु मैत्री कृषि प्रविधिलगायतका विषयमा युवा कृषकहरुलाई जानकारी गराउनुभयो।
कृषि युवा सञ्जालकी संयोजक रविना चौधरीले सञ्जालमा आबद्ध भएपछि युवाहरुमा आफ्ना कुरा राख्ने क्षमता बढेको र स्थानीय सरकारसँग विकास तथा कृषि क्षेत्रका लागि बजेट माग गर्न सक्ने अवस्था सिर्जना भएको बताउनुभयो।
सम्मेलनमा सहभागी युवाहरुले समूहगत छलफलमार्फत आ–आफ्नो पालिकामा कृषि युवा सञ्जालले गरेका गतिविधि, स्थानीय कृषि समस्या तथा आगामी कार्ययोजनाका विषयमा छलफल गरेका छन्। सम्मेलनमा रैथाने बीउबिजनको संरक्षण, पर्यावरणीय कृषि, जलवायु मैत्री कृषि प्रविधि तथा युवाको कृषि क्षेत्रमा सहभागिताका विषयमा विभिन्न सत्र सञ्चालन हुने आयोजकले जनाएको छ।
Discussion about this post