कञ्चनपुर । भूमि व्यवस्था, सहकारी, संघीय मामिला तथा सामान्य प्रशासनमन्त्री प्रतिभा रावल भदौ ६ गतेदेखि ९ गतेसम्म सुदूरपश्चिम प्रदेशको भ्रमणमा आउने भएकी छन्।
मन्त्री रावल भदौ ६ गते बिहान ८ बजे काठमाडौंँबाट धनगढी पुग्ने कार्यक्रम रहेको छ। धनगढी पुगेपछि उनले कैलालीका प्रमुख जिल्ला अधिकारी तथा मालपोत र नापी कार्यालयका प्रमुखसँग छलफल गर्नेछिन्। त्यसपछि धनगढी उपमहानगरपालिकाको अनुगमन गरी साँझ महेन्द्रनगर आउने कार्यतालिका रहेको छ।
भदौ ७ गते बिहान मन्त्री रावलले कञ्चनपुरका प्रमुख जिल्ला अधिकारी तथा मालपोत र नापी कार्यालयका प्रमुखसँग छलफल गर्नेछिन्। त्यसपछि उनले भीमदत्त, बेदकोट र दोधाराचाँदनी नगरपालिकाको अनुगमन गर्ने कार्यक्रम रहेको छ।
त्यसैगरी, भदौ ९ गते बिहान १० बजेदेखि दिउँसो १२ बजेसम्म डडेल्धुराका प्रमुख जिल्ला अधिकारी तथा मालपोत र नापी कार्यालयका प्रमुखसँग छलफल गर्ने कार्यक्रम तय भएको छ। छलफलपछि मन्त्री रावलले अमरगढी नगरपालिकाको अनुगमन गर्नेछिन्।
अनुगमन सम्पन्न गरी मन्त्री रावल सोही साँझ महेन्द्रनगर फर्किने कार्यतालिका रहेको जनाइएको छ।
Discussion about this post